ԵՐԵՎԱՆԻ ՔԻՄԻԱԿԱՆ ՖԻԶԻԿԱՅԻ ԻՆՍՏԻՏՈՒՏԻ ՄՇԱԿՈՒՄՆԵՐԸ ԿԿԻՐԱՌՎԵՆ
«ՄԱՔՈՒՐ ԵՐԿԱԹԻ ԳՈՐԾԱՐԱՆ»-ՈՒՄ ԵՎ «ԱԼՄԱՍՏՈՒՄ»
07-09-2007 20:00:00 | Հայաստան | Տնտեսություն
ԵՐԵՎԱՆ, 7 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ ԳԱԱ Քիմիական
ֆիզիկայի ինստիտուտի մշակած մոլիբդենի մանրափոշիների ստացման
տեխնոլոգիաները նախատեսվում է կիրառել մոլիդբդենի համաձուլվածքներ
արտադրող «Մաքուր երկաթի գործարան»-ում: Այս մասին «ՆՈՅՅԱՆ
ՏԱՊԱՆ»-ի թղթակցին հայտնեց Ինստիտուտի Բարձրջերմաստիճանային
ինքնատարածվող սինթեզի (ԲԻՍ) կինետիկայի լաբորատորիայի եւ Երեւանի
պետական համալսարանի քիմիական ֆիզիկայի ամբիոնի վարիչ Սուրեն
Խառատյանը:
Նրա խոսքերով, ինստիտուտը մշակել է մոլիբդենի օքսիդից մաքուր
մոլիբդենի եւ մոլիբդենի դիսիլիցիդի մանրափոշիների ստացման
տեխնոլոգիաներ, որոնց փոխանցման ուղղությամբ բանակցություններ է
սկսել գործարանի հետ: Ս.Խառատյանը հույս հայտնեց, որ նշված
մանրափոշիների արտադրությունը կկազմակերպվի «Մաքուր երկաթի
գործարան»-ում: «Եթե մենք համեմատում ենք մոլիբդենի մանրափոշու
ստացման տեխնոլոգիաները, ապա մեր տեխնոլոգիան, որը հիմնված է ԲԻՍ
պրոցեսների վրա, բարդ եւ թանկ է: Բայց մեր տեխնոլոգիայով ստացվող
նյութի մաքրությունը շատ ավելի բարձր է, հետեւաբար, այն մի քանի
անգամ թանկ է, քան այլ տեխնոլոգիաներով ստացվողները:
Նշվեց, որ ինստիտուտի մշակած տեխնոլոգիաներով ստացվող նիկելի
եւ կոբալտի մանրափոշիները որոշակի փորձաքանակներով սկսել են
օգտագործվել Երեւանի «Ալմաստ» գործարանում` կտրող գործիքների
արտադրության մեջ: Այդ մանրափոշիները գործարանի կողմից
օգտագործվում են նաեւ որպես արհեստական ալմաստների սինթեզի
կատալիզատոր: Ս.Խառատյանը հույս հայտնեց, որ ինստիտուտի
համագործակցությունը «Ալմաստի» հետ կընդլայնվի: