2007 Թ.-ԻՆ ՆԱԽՈՐԴ ՏԱՐՎԱ ՀԱՄԵՄԱՏ ՀԻՓՈԹԵՔԱՅԻՆ ՎԱՐԿԱՎՈՐՄԱՆ
ԾԱՎԱԼՆԵՐԸ ԿԿՐԿՆԱՊԱՏԿՎԵՆ
06-09-2007 20:30:00 | Հայաստան | Տնտեսություն
ԵՐԵՎԱՆ, 6 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Կանխատեսվում է, որ
2007թ.-ի արդյունքներով նախորդ տարվա համեմատ Հայաստանում
հիփոթեքային վարկավորման ծավալները առնվազն կկրկնապատկվեն: Այս
մասին սեպտեմբերի 6-ի ասուլիսում հայտնեց ՀՀ Կենտրոնական բանկի
Ֆինանսական համակարգի քաղաքականության եւ վերլուծությունների
վարչության պետ Դավիթ Սարգսյանը:
Նշենք, որ 2006թ.-ին ՀՀ բանկերի կողմից հիփոթեքային
վարկավորման ծավալը կազմել է 23 մլրդ 770 մլն 50 հազար դրամ (ավելի
քան 57 մլն 134 հազար ԱՄՆ դոլար) կամ նախորդ տարվա համեմատ 114%-ով
ավելի:
Դ.Սարգսյանի խոսքերով, այս տարվա անցած ամիսներին առաջանցիկ
աճ է արձանագրվել նաեւ սպառողական, առեւտրի, արդյունաբերության եւ
գյուղատնտեսության ոլորտների վարկավորման ուղղություններով:
Մասնավորապես, արդյունաբերության եւ գյուղատնտեսության վարկավորման
ծավալներն աճել են 27-35-ական տոկոսով: Ըստ ՀՀ ԿԲ ներկայացուցչի,
այդ ոլորտների վարկավորման ծավալների աճի տեմպերը կպահպանվեն
մինչեւ այս տարեվերջ:
նշենք, որ 2006թ.-ի դեկտեմբերի 31-ի դրությամբ
արդյունաբերության ճյուղին տրամադրված 39 մլրդ 263 մլն 980 հազար
դրամ գումարը մեկ տարվա ընթացքում աճել էր 0,4%-ով, իսկ
գյուղատնտեսության ճյուղի պարագայում 14 մլրդ 196 մլն 429 հազար
դրամ գումարը մեկ տարվա ընթացքում աճել էր 25,6%-ով:
Այս տարվա հունվար-հունիսին վարկավորման տոկոսադրույքների
միջին նվազումը, ըստ Դ.Սարգսյանի, կազմել է 0,5%. եթե բիզնեսի
վարկավորումը 2006թ.-ին իրականացվում էր 15% միջին տոկոսադրույքով,
ապա ներկայումս այդ ցուցանիշը 14-14,2% է, իսկ սպառողական
վարկավորման տոկոսադրույքները 21-21,5%-ից նվազել են մինչեւ 19%: