ԵՐԵՎԱՆ, 16 ՕԳՈՍՏՈՍԻ, ՆՈՅՅԱՆ ՏԱՊԱՆ: Հայաստանի բարձր տեխնոլոգիաների ոլորտ ներդրումների ներհոսքը եւ նոր տեխնոլոգիաների մուտքը խթանելու համար անհրաժեշտ է տեխնոպարկերին տրամադրել հատուկ տնտեսական գոտու կարգավիճակ, ինչպես նաեւ մշակել տեխնոպարկերի, ինկուբատորների, հատուկ տնտեսական գոտիների մասին օրենսդրություն: Այս կարծիքը «ՆՈՅՅԱՆ ՏԱՊԱՆ»-ի թղթակցի հետ զրույցի ժամանակ հայտնեց «Վիասֆեր Տեխնոպարկ»-ի գլխավոր տնօրեն Արամ Վարդանյանը: «Խոսքը վերաբերում է նշված կառույցների ոչ միայն հարկային եւ մաքսային առավելություններին, այլեւ դրանց գործունեության զուտ կանոնադրական խնդիրներին»,- նշեց Ա.Վարդանյանը: Նա հավելեց, որ «Վիասֆեր Տեխնոպարկ»-ը ներկայումս գործում է առեւտրային կազմակերպությունների օրենսդրական դաշտում` փակ բաժնետիրական ընկերության կարգավիճակով, ինչը պարտադրում է տեխնոպարկի եւ տեխնոպարկում գործող ընկերությունների միջեւ հարաբերությունները կառուցել առեւտրային հիմունքներով: Նշվեց, որ տեխնոպարկն այդ ձեռնարկություններին տրամադրում է ծառայություններ (նաեւ կոմունալ), տեխնիկական աջակցություն եւ խորհրդատվություն, որոնց տրամադրումը առեւտրային հիմունքներով աննպատակահարմար է:

---