ԱՄԵՐԻԿՅԱՆ ԳԵՆԵՐԱԼԸ ՀՅՈՒՍԻՍԱՅԻՆ ԻՐԱՔՈՒՄ ԵԶԴԻԱԲՆԱԿ ՇՐՋԱՆՆԵՐԻ
ԴԵՄ ԿԱԶՄԱԿԵՐՊՎԱԾ ԱՀԱԲԵԿՉԱԿԱՆ ՀԱՐՁԱԿՈՒՄԸ ՈՐԱԿԵԼ Է ՈՐՊԵՍ
«ԷԹՆԻԿԱԿԱՆ ԶՏՈՒՄ»
16-08-2007 17:35:00 | Իրաք | Միջազգային
ԲԱՂԴԱԴ, 16 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 14-ին Իրաքի
հյուսիսային հատվածում` Սիրիայի սահմանին, եզդիաբնակ շրջանների դեմ
կազմակերպված ահաբեկչական հարձակումը Իրաքում ամերիկյան
գեներալներից Բենջամին Միքսոնը որակել է որպես «էթնիկական զտում»:
Այս մասին հաղորդում են թուրքական աղբյուրները:
«Այս հարձակումը կարելի է որակել որպես էթնիկական զտում,
նույնիսկ` կոտորած»,- հայտարարել է ամերիկացի գեներալը:
Նշենք, որ եզդիաբնակ շրջաններում մահապարտ ահաբեկիչների
իրականացրած 4 պայթյունների հետեւանքով զոհվածների թիվը հասել է
500-ի, իսկ վիրավորներինը` 350-ի: Ենթադրվում է, որ այս
պայթյունների ետեւում կանգնած է «Ալ Ղաիդա» ահաբեկչական
կազմակերպությունը: