ԻՐԱՆԻ ՆԱԽԱԳԱՀԻ ՏԵՂԱԿԱԼԸ ՆԵՐԿԱ ԿԼԻՆԻ ՀԱՄԱՀԱՅԿԱԿԱՆ 4-ՐԴ
ԽԱՂԵՐԻՆ
03-08-2007 16:06:00 | Հայաստան | Սպորտ
ԵՐԵՎԱՆ, 3 ՕԳՈՍՏՈՍԻ, ՆՈՅՅԱՆ ՏԱՊԱՆ: Օգոստոսի 3-ին ՀՀ սպորտի
եւ երիտասարդության հարցերի նախարար Արմեն Գրիգորյանն ընդունել է
Հայաստանում Իրանի Իսլամական հանրապետության դեսպանի տեղակալ Ալի
Աքբար Ջոքարին:
Հանդիպման ընթացքում քննարկվել են երկու երկրների միջեւ
մարզական կապերի զարգացման հեռանկարները: Իրանի փոխդեսպանը հույս է
հայտնել, որ այդ կապերը ավելի կխորանան: Նա նաեւ տեղեկացրել է, որ
համահայկական 4-րդ խաղերին ներկա կլինի Իրանի նախագահի տեղակալ,
սպորտի հարցերը համակարգող Ալի Աբադին:
Իր հերթին Ա.Գրիգորյանը նշել է, որ Հայաստանի համար դժվար
տարիներին` ԽՍՀՄ-ի փլուզումից հետո, հայկական սպորտի զարգացման
ռիթմը չխախտվեց Իրանի հետ մարզական կապերի հաստատման շնորհիվ:
Նախարարը ընդգծել է նաեւ, որ Հայաստանի առանձին մարզաձեւերի
հավաքականները ամեն տարի մասնակցում են Իրանում անցկացվող
«Արեւածագի 10 օր» անվանումը կրող միջազգային մրցումներին:
Զրուցակիցները պայամանավորվել են համատեղ մշակել սպորտի
բնագավառում երկկողմ համագործակցության ծրագիր: