ՆՅՈՒ ՅՈՐՔ, 1 ՕԳՈՍՏՈՍԻ, ՆՈՅՅԱՆ ՏԱՊԱՆ: ՄԱԿ-ի Անվտանգության
խորհուրդը հավանություն է տվել Սուդանի արեւմուտքում գտնվող`
արյունահեղ հակամարտությունից բզկտվող Դարֆուրի նահանգ
խաղաղարարական ուժեր ուղարկելու մասին բանաձեւին: Դա կլինի աշխարհի
ամենախոշոր խաղաղարարական զորակազմը, ուր ներգրավված կլինեն 26
հազար զինվորականներ եւ քաղաքացիական անձինք:
Անվտանգության խորհրդի անդամները միաձայն կողմ են քվեարկել
բանաձեւին, մինչ այդ ստանալով Չինաստանի աջակցությունը, որ
արտակարգ կարեւոր նշանակություն ուներ փաստաթղթի ճակատագրի համար:
ՄԱԿ-ի գլխավոր քարտուղար Պան Գի Մունը «պատմական եւ աննախադեպ» է
համարել խաղաղարարական առաքելությունն այս տարածաշրջանում:
Դարֆուրում հակամարտության հետեւանքով, որ սկսվել է 2003
թվականին, զոհվել են, ըստ առկա տեղեկությունների, առնվազն 200
հազար մարդ: Եվս մոտ 2 միլիոն մարդ մնացել է անօթեւան: