ՀՆԴԻԿ ՌԵԺԻՍՈՐ ՌԱՄՉԱՆԴՐԱ ՓԻ ԷՆԸ ՀԱՄՈԶՎԱԾ Է, ՈՐ ՀԱՅԵՐՆ ՈՒ
ՀՆԴԻԿՆԵՐԸ ԿԱՐՈՂ ԵՆ ԼԱՎ ԿԻՆՈ ՆԿԱՐԵԼ
12-07-2007 19:30:00 | Հայաստան | Մշակույթ
ԵՐԵՎԱՆ, 12 ՀՈՒԼԻՍԻ, ՆՈՅՅԱՆ ՏԱՊԱՆ: «Ոսկե ծիրան» միջազգային
4-րդ կինոփառատոնի մասնակից հնդիկ ռեժիսոր Ռամչանդրա Փի Էնը առաջին
անգամ է այցելում Հայաստան: Հայերը, նրա բնորոշմամբ, հիանալի ու
ժպտերես, հյուրասեր ու ընկերասեր մարդիկ են: «Այս երկիրը հիանալի
տարածք ունի: Իսկ երբ օդանավից դուրս եկա, ինձ հմայեց բացված
հիասքանչ տեսարանը` Բիբլիական Արարատ լեռը»,- իր այս
տպավորություններով «ՆՈՅՅԱՆ ՏԱՊԱՆ»-ի թղթակցի հետ կիսեց հնդիկ
ռեժիսորը:
Հայկական մշակույթին Ռամչանդրա Փի Էնը նոր է ծանոթանում,
սակայն գիտի, որ հայերն ունեն Փարաջանով, ով կինոաշխարհում հայտնի
է իր անկրկնելի փիլիսոփայական ֆիլմերով. «Ես արդեն ձեռք եմ բերել
նրա ֆիլմերից»:
Հնդիկ ռեժիսորի համոզմամբ, հայերն ու հնդիկները ամենահին
մշակույթ ունեցող երկրներից են, եւ լավ կլինի, եթե «մենք
միավորվենք ու միասին ֆիլմեր նկարենք, քանի որ երկու կողմերի
ռեժիսորներն էլ ունեն այդ ներուժը»:
«Ջնջվող ծեսեր» կինոնկարը ռեժիսորի առաջին գեղարվեստական
աշխատանքն է: Այն ընդգրկված է «Ոսկե ծիրան» կինոփառատոնի
միջազգային խաղարկային ֆիլմերի մրցութային ծրագրում:
Ռեժիսորի խոսքերով, «Ջնջվող ծեսեր» կինոնկարում ինքը
անդրադարձել է Հնդկաստանում ապրող բոլոր կրոնական համայնքների
ընտանեկան ծեսերին ու սովորույթներին, որոնք աստիճանաբար ջնջվում
ու մոռացվում են: Եվ այդ մոռացումի ճանապարհը, ըստ ռեժիսորի, լի է
բախումներով ու խնդիրներով: