«ԱՌՈՂՋԱՊԱՀՈՒԹՅՈՒՆ ԵՎ ԴԵՂԱԳՈՐԾՈՒԹՅՈՒՆ EXPO 2007» ՄԻՋԱԶԳԱՅԻՆ
ՑՈՒՑԱՀԱՆԴԵՍԻՆ ՄԱՍՆԱԿՑՈՒՄ ԵՆ ԱՎԵԼԻ ՔԱՆ 50 ԸՆԿԵՐՈՒԹՅՈՒՆՆԵՐ
29-06-2007 19:45:00 | Հայաստան | Հասարակություն
ԵՐԵՎԱՆ, 29 ՀՈՒՆԻՍԻ, ՆՈՅՅԱՆ ՏԱՊԱՆ: Հունիսի 29-ին Երեւանի
«Մոսկվայի տուն» կենտրոնում բացված «Առողջապահություն եւ
դեղագործություն. EXPO 2007» միջազգային մասնագիտացված թվով 6-րդ
ցուցահանդեսում ներկայացված են առողջապահության եւ դեղագործության
հիմնական ոլորտները: Ցուցահանդեսին, որը կգործի մինչեւ հուլիսի
1-ը, մասնակցում են բժշկական ծառայություններ մատուցող եւ
դեղագործական ավելի քան 50 ընկերություններ` Հայաստանից,
Ռուսաստանից եւ Բելառուսից:
Ինչպես ցուցահանդեսի բացմանը նշեց ՀՀ առողջապահության
փոխնախարար Թաթուլ Հակոբյանը, դեղագործության եւ
բուժծառայությունների մատուցման ոլորտում առաջընթաց է
արձանագրվում: Նրա խոսքերով, յուրաքանչյուր մարդու առողջությունը
մեծ արժեք է, եւ երկրի տնտեսական զարգացման հիմքը հենց բնակչության
առողջությունն է: Այդ իսկ պատճառով, ըստ նրա, առողջապահության
բնագավառում առաջին հերթին պետք է ուշադրություն դարձվի բժշկական
օգնության եւ ծառայությունների որակի վրա, իսկ ֆինանսական շահերը
պետք է երկրորդ պլանում լինեն:
Հայաստանի երկրորդ միջազգային բժշկական համագումարի
շրջանակում անցկացվող ցուցահանդեսը կազմակերպել է LOGOS EXPO
Center ցուցահանդեսային ընկերությունը` ՀՀ Առողջապահության
նախարարության աջակցությամբ: