ՀԱՅԱՍՏԱՆԻ 16 ՀԱՄԱՅՆՔՆԵՐՈՒՄ ԿԻՐԱԿԱՆԱՑՎԻ ԱԿԱՆՆԵՐԻ ՌԻՍԿԻ
ՈՒՍՈՒՑՄԱՆ ԾՐԱԳԻՐ
26-06-2007 18:20:00 | Հայաստան | Հասարակություն
ԵՐԵՎԱՆ, 26 ՀՈՒՆԻՍԻ, ՆՈՅՅԱՆ ՏԱՊԱՆ: Հայկական կարմիր խաչի
ընկերությունը (ՀԿԽԸ) Հայաստանի սահմանամերձ հինգ մարզերի 16
համայնքներում կիրականացնի ականների ռիսկի ուսուցման ծրագիր, որի
շրջանակներում բնակչությունը կիրազեկվի չպայթած զինամթերքի
վտանգների մասին այն վայրերում, որտեղ առկա է դրանց հայտնաբերման
հավանականությունը: Ինչպես հունիսի 26-ին լրագրողներին հայտնեց
ՀԿԽԸ-ի գլխավոր քարտուղար Աննա Եղիազարյանը, ծրագրի իրականացման
համար անհրաժեշտ` 1 մլն 510 հազար դրամը (մոտ 4,3 հազ. ԱՄՆ դոլար)
հանգանակվել է այս տարվա ապրիլին Հայաստանում ԱՄՆ գործերի
ժամանակավոր հավատարմատար Էնթնի Գոդֆրիի կողմից կազմակերպած
բարեգործական ընթրիքի ժամանակ:
Ա.Եղիազարյանը տեղեկացրեց, որ 2005թ.-ի տվյալներով
Հայաստանում կասկածելի աղտոտված տարածքները կազմում են մոտ 321
քառ. կմ, իսկ ականներից եւ չպայթած զինամթերքից տուժածների
ընդհանուր թիվը կազմում է 394 հազար մարդ, որոնցից 110 զոհվել են,
284-ը` վիրավորվել: Ընդ որում, 14 դեպք գրանցվել է վերջերս:
Է.Գոդֆրին նշեց, որ ականների ռիսկի հետ կապված խնդիրներն
այնքան ծավալուն են, որ կառավարությունները դրանք միայնակ չեն
կարող լուծել: «Սա մի աշխատանք է, որին կմիանան հայկական
կազմակերպությունները եւ ավելի ակտիվ մասնակցություն կունենան նման
աշխատանքներում»,- ասաց նա: