2008 Թ.-ԻՆ ՓԱԽՍՏԱԿԱՆՆԵՐԻ ԲՆԱԿԱՐԱՆԱՅԻՆ ԱՊԱՀՈՎՈՒԹՅԱՆ ՊԵՏԱԿԱՆ
ԾՐԱԳԻՐԸ ԿԻՐԱԿԱՆԱՑՎԻ ՆԱԵՎ ԵՐԵՎԱՆՈՒՄ
20-06-2007 19:15:00 | Հայաստան | Հասարակություն
ԵՐԵՎԱՆ, 20 ՀՈՒՆԻՍԻ, ՆՈՅՅԱՆ ՏԱՊԱՆ: ՄԱԿ-ի Փախստականների
հարցերի գերագույն հանձնակատարի հայաստանյան գրասենյակի եւ
Փախստականների հարցերի Նորվեգական խորհրդի ֆինանսավորմամբ
Հայաստանում 1994թ.-ից մինչ օրս կառուցվել եւ փախստականներին
հատկացվել 4500 բնակարաններ: Այս մասին «ՆՈՅՅԱՆ ՏԱՊԱՆ»-ի թղթակցին
հայտնեց ՀՀ Տարածքային կառավարման նախարարության Միգրացիոն
գործակալության Փախստականների հարցերի վարչության պետ Արա
Հարությունյանը: Ըստ նրա, ներկայումս էլ այդ կազմակերպությունների
ֆինանսավորմամբ հանրապետության մարզերում իրականացվում է
բնակարանաշինարարության ծրագիր:
Ա.Հարությունյանը նշեց, որ փախստականների բնակարանային խնդիրը
լուծվում է նաեւ պետական աջակցությամբ: 2005թ.-ից իրականացվող
«Ադրբեջանից բռնագաղթած անձանց բնակարանային ապահովության» պետական
ծրագրով նախատեսվում է բնակարանով ապահովել տնակներում եւ վարչական
շինություններում բնակվող 3500 ընտանիքի: Ծրագիրը, որով
փախստականներին տրվում են բնակարանների գնման սերտիֆիկատներ, արդեն
իրականացվել է հանրապետության 9 մարզերում: Այս տարի այն
իրականացվում է Կոտայքի մարզում, իսկ 2008-ին կիրականացվի նաեւ
Երեւանում:
Նշենք, որ հունիսի 20-ը Փախստականների միջազգային օրն է: