ԵՐԵՎԱՆ, 14 ՀՈՒՆԻՍԻ, ՆՈՅՅԱՆ ՏԱՊԱՆ: «Հայոց լեզու, գրականություն» միասնական քննության գործընթացի արդյունքները գոհացուցիչ են»,- հունիսի 14-ի ասուլիսում հայտնեց ՀՀ կրթության եւ գիտության փոխնախարար Արա Ավետիսյանը` հավելելով, որ հաջորդ տարի եւս մի քանի առարկաների քննություններ կանցկացվեն միասնական կարգով: Ըստ նրա, նոր համակարգով քննության անցկացումը, այդ թվում նաեւ քննական գործընթացի տեսագրումը, կնպաստի համակարգում կոռուպցիոն ռիսկերի նվազեցմանը: Փոխնախարարը հայտնեց, որ այս տարի մնացած առարկաների կենտրոնացված համակարգով անցկացվող քննությունների ժամանակ նույնպես տեսախցիկներ կտեղադրվեն բոլոր քննասենյակներում: Ա.Ավետիսյանը նշեց նաեւ, որ այս տարի եւս կանցկացվեն նպատակային ընդունելություններ` մանկավարժական, ագրարային մասնագիտությունների գծով: Ըստ փոխնախարարի, դրա նպատակն է լրացնել բարձր լեռնային եւ սահմանամերձ գյուղական բնակավայրերում առկա մանկավարժական, ինչպես նաեւ անասնաբույժների եւ անասնաբույծների թափուր տեղերը: Ա.Ավետիսյանը հայտնեց նաեւ, որ երկու նոր` հատուկ կրթության եւ սոցիալական մանկավարժության, մասնագիտություններ են ներդվել Գյումրիի, Գավառի եւ Վանաձորի բուհերում:

---