ԵՐԵՎԱՆՈՒՄ ԱՄԵՐԻԿԱՑԻ ԵՐԱԺԻՇՏՆԵՐԸ ԿՆԵՐԿԱՅԱՑՆԵՆ
ԱՖՐՈ-ԿՈՒԲԱՅԱԿԱՆ ՋԱԶ ԵՐԱԺՇՏՈՒԹՅՈՒՆ
14-06-2007 18:13:00 | Հայաստան | Մշակույթ
ԵՐԵՎԱՆ, 14 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ-ում ԱՄՆ դեսպանատան
նախաձեռնությամբ կազմակերպվող «Ամերիկյան ջազը Հայաստանում» ծրագրի
շրջանակներում հունիսի 14-ին Երեւանի «Աստրալ» ակումբում, իսկ
հունիսի 15-ին «Կասկադ» համալիրում կկայանան թմբկահար, կոմպոզիտոր
Բոբբի Սանաբրիայի եւ «Quarteto Ache» խմբի համերգները: Ամերիկացի
երաժիշտները հայ ունկնդրին կներկայացնեն Կուբայում ծնունդ առած,
բայց 1940-ականներին Նյու Յորքում ձեւավորված աֆրո-կուբայական ոճի
ջազ երաժշտություն: «Quarteto Ache»-ի հրավերով համերգներին
կմասնակցի նաեւ ամերիկահայ դաշնակահար Արմեն Դոնելյանը:
Հունիսի 14-ի ասուլիսում Բ.Սանաբրիան հայտնեց, որ թեեւ իրենք
Հայաստանում առաջին անգամն են համերգներ ունենում, սակայն վստահ
են, որ հայերին դուր կգա լատինամերիկյան ջազը: «Այսօր ամբողջ
աշխարհում ջազը տարածված է: Ջազի մեջ ներգրավված են տարբեր ազգերի
մշակույթների տարրեր, այդ իսկ պատճառով գրեթե բոլորին այն դուր է
գալիս»,- ընդգծեց ամերիկացի երաժիշտը: Բ.Սանաբրիան նշեց նաեւ, որ
ինքը Նյու Յորքում բազմաթիվ հայ ընկերներ ունի եւ որոշ չափով ծանոթ
է հայկական մշակույթին:
Ըստ Ա.Դոնելյանը, թեեւ ինքը ծնվել է ԱՄՆ-ում, սակայն ստացել է
հայեցի դաստիարակություն: «Ես փոքրուց լսել եմ հայկական
երաժշտություն, այդ պատճառով էլ իմ ստեղծագործություններում առկա
են հայկական երանգներ: Բացի դրանից, մենահամերգների ժամանակ ես
կատարում եմ հայ կոմպոզիտորների գործեր»,- նշեց ամերիկահայ
դաշնակահարը: Նրա խոսքերով, ինքը երկար տարիներ համագործակցել է
ջազային երգչուհի Տաթեւիկ Հովհաննիսյանի հետ, որին համարում է
«հայկական ջազի դուստր»: