ՋՈՐՋ ԲՈՒՇՆ ԱՌԱՋԱՐԿԵԼ Է ՍԱՀՄԱՆԵԼ ՎԵՐՋՆԱԺԱՄԿԵՏ ԿՈՍՈՎՈՅԻ
ԿԱՐԳԱՎԻՃԱԿԻ ՎԵՐԱԲԵՐՅԱԼ ՄԱԿ ԱԽ ԲԱՆԱՁԵՎԻ ԸՆԴՈՒՆՄԱՆ ՀԱՄԱՐ
11-06-2007 18:58:00 | Ալբանիա | Միջազգային
ՏԻՐԱՆԱ, 11 ՀՈՒՆԻՍԻ, ՆՈՅՅԱՆ ՏԱՊԱՆ: ԱՄՆ-ի նախագահ Ջորջ Բուշը
Ալբանիայի մայրաքաղաք Տիրանայում մամլո ասուլիսի ժամանակ
հայտարարել է, որ եկել է ժամանակը դադարեցնելու «անվերջանալի
երկխոսությունը» Կոսովոյի կարգավիճակի վերաբերյալ: «Նպատակը`
անկախություն: Ժամանակը` հիմա»,- ընդգծել է նա: Բուշն առաջարկել է
վերջնաժամկետ սահմանել Կոսովոյի կարգավիճակի վերաբերյալ ՄԱԿ-ի
Անվտանգության խորհրդի բանաձեւի ընդունման համար: Ավելի վաղ, Մեծ
ութնյակի Հայլիգենդամի գագաթնաժողովի ընթացքում Ֆրանսիայի նախագահ
Նիկոլյա Սարկոզին առաջարկել էր կես տարով հետաձգել այդ հարցի
լուծումը: Բանաձեւի նախագիծը, որ հիմնված է ՄԱԿ-ի հատուկ դեսպանորդ
Մարտի Ահտիսաարիի ծրագրի վրա եւ ենթադրում է Կոսովոյի անկախության
փաստական ճանաչում, ՄԱԿ-ի ԱԽ է ներկայացվել մայիսի վերջին:
Սերբիան մերժել է Ահտիսաարիի ծրագիրը, իսկ Ռուսաստանը
հայտարարել, որ հնարավոր չի համարում Կոսովոյի կարգավիճակի
վերաբերյալ որոշման ընդունումը առանց հաշվի առնելու սերբական
ղեկավարության կարծիքը: Բուշը, իր հերթին, հավաստել է, որ ԱՄՆ-ը
լիովին պաշտպանում է Ահտիսաարիի ծրագիրը, հաղորդում է
«Ֆրանսպրեսը»: