ԲԱՂԴԱԴ, 30 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 29-ին Բաղդադում ֆինանսների նախարարության շենքից առեւանգվել են Բրիտանիայի 5 քաղաքացիներ` 4 թիկնապահ եւ մեկ համակարգչային մասնագետ: Ականատեսների վկայությամբ առեւանգումը իրականացրել են իրաքյան ոստիկանների համազգեստով հանդերձավորված զինված անձինք: Իրաքի արտաքին գործերի նախարար Հոշիար Զաբերին հայտարարել է, թե 5 բրիտանացիները ամենայն հավանականությամբ առեւանգվել են շիական «Մահդիի բանակ» խմբավորման կողմից: Մեծ Բրիտանիայի վարչապետ Թոնի Բլերը խոստացել է անել հնարավորը` առեւանգված քաղաքացիների ազատման համար: Նույն օրը ուշ երեկոյան դեպքի կապակցությամբ տեղի է ունեցել բրիտանական կառավարության հակաճգնաժամային հանձնաժողովի արտահերթ նիստ, որի ընթացքում քննարկվել են պատանդներին վերադարձնելու հնարավոր ուղիները:

---