ՄԱՅԻՍԻ 26-ԻՆ ԷԼԻՍՏԱՅՈՒՄ ՄԵԿՆԱՐԿԵԼԻՔ ԱՇԽԱՐՀԻ ՇԱԽՄԱՏԻ
ԱՌԱՋՆՈՒԹՅԱՆ ՀԱՎԱԿՆՈՐԴՆԵՐԻ ՄՐՑԱՇԱՐԻՆ ԿՄԱՍՆԱԿՑԻ ԳՐՈՍՄԱՅՍՏԵՐ ԼԵՎՈՆ
ԱՐՈՆՅԱՆԸ
24-05-2007 17:10:00 | Հայաստան | Սպորտ
ԵՐԵՎԱՆ, 24 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 24-ի Կալմիկիայի
մայրաքաղաք Էլիստա մեկնեցին գրոսմայստեր Լեւոն Արոնյանը եւ նրա
մարտավկա Գաբրիել Սարգսյանը:
Մայիսի 26-ին Էլիստայում տեղի կունենա աշխարհի շախմատի
առաջնության հավակնորդների 8 զույգերի մրցամարտերի բացման
հանդիսավոր արարողությունը:
Լեւոն Արոնյանի մրցակիցը կլինի Մագնուս Կառլսենը (Նորվեգիա):
Մյուս 7 զույգերն են` Ալեքսեյ Շիրով (Իսպանիա) - Մայքլ Ադամս
(Անգլիա), Պետեր Լեկո (Հունգարիա) - Միխայիլ Գուրեւիչ (Թուրքիա),
Հուդիթ Պոլգար (Հունգարիա) - Եվգենի Բարեեւ (Ռուսաստան), Ռուսլան
Պոնոմարյով (Ուկրաինա) - Սերգեյ Ռուբլեւսկի (Ռուսաստան), Ալեքսանդր
Գրիշչուկ (Ռուսաստան) - Վլադիմիր Մալախով (Ռուսաստան), Բորիս
Գելֆանդ (Իսրայել) - Ռուստամ Կասիմջանով (Ուզբեկստան), Էթիեն Բաքրո
(Ֆրանսիա) - Գատա Կամսկի (ԱՄՆ):
Մրցամարտերից յուրաքանչյուրում կխաղարկվի 6-ական պարտիա
(մայիսի 27, 28, 29, 31 եւ հունիսի 1, 2): Հավասար` 3:3, հաշվի
դեպքում կնշանակվեն արագ շախմատի, իսկ անհրաժեշտության դեպքում
նաեւ` կայծակնային խաղի լրացուցիչ հանդիպումներ: Լ.Արոնյանը
հաջողության հասնելու պարագայում կմրցի Շիրով - Ադամս զույգի
հաղթողի հետ:
Մրցաշարի 2-րդ փուլի 4 մրցամարտերը նշանակված են հունիսի
6-13-ը:
Մրցաշարի գլխավոր մրցավարն է միջազգային կարգի մրցավար Անջեյ
Ֆիլիպովիչը (Լեհաստան): Մրցամարտերից յուրաքանչյուրի համար
սահմանված մրցանակային հիմնադրամը 40 հազար ԱՄՆ դոլար է: