ԵՐԵՎԱՆ, 1 ՄԱՅԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Ավելի քան 10
տարվա ընմիջումից հետո Հայաստան է այցելել ֆրանսահայ երգիչ Մարթեն
Յորգանցը: Հայտնի երգիչը ապրիլի 29-30-ը համերգներ է ունեցել
Երեւանում: Ինչպես «ՆՈՅՅԱՆ ՏԱՊԱՆ»-ի թղթակցին հայտնեց Մ.Յորգանցը,
երեւանյան համերգները մեկ անգամ եւս ապացուցեցին, որ Հայաստանում
սիրում են իր երգերը: Նրա խոսքերով, հաշվի առնելով այդ հանգամանքը,
նախատեսվում է սեպտեմբերին նոր համերգներ կազմակերպել հայրենիքում:
Մ.Յորգանցը նշեց, որ այսօր Երեւանը բոլորովին այլ պատկեր
ունի: Վերջին տարիներին կառուցված բնակելի շենքերը, ռեստորաններն
ու հյուրանոցները, ըստ նրա, ավելի են գեղեցկացնում Երեւանը: Երգիչը
համոզված է, որ եթե այս տենդենցը շարունակվի, ապա մի քանի տարի
հետո Երեւանը կհամեմատեն եվրոպական մայրաքաղաքների հետ:
Ըստ նրա, ուրախալի է նաեւ այն, որ սփյուռքահայերը վերջին
տարիներին ավելի շատ են գալիս հայրենիք, եւ շատերը նույնիսկ
ցանկություն ունեն մշտական բնակություն հաստատել Հայաստանում:
Անդրադառանալով իր երգարվեստին, Մ.Յորգանցը նշեց, որ երկու
տարին մեկ հայերենով, ֆրանսերենով եւ իտալերենով թողարկվում են իր
ձայնասկավառակները, իսկ հյուրախաղերով նա հանդես է գալիս այն
երկրներում, որտեղ կան հայկական գաղթօջախներ: «Սփյուռքահայ
երիտասարդներն այսօր ավելի շատ նախընտրում են լսել հայկական երգեր:
Եվ ես ամեն ինչ անում եմ, որպեսզի նրանց ներկայացնեմ ոչ միայն
սիրային, այլեւ հայրենասիրական երգեր, քանի որ ազգը պահպանելու
համար երգը կարեւոր դերակատարություն ունի»,- ընդգծեց ֆրանսահայ
երգիչը:
Մ.Յորգանցի համար ցավալի է, որ Հայաստանում երգիչները փորձում
են հայկական երգերի մեջ մտցնել եվրոպական եւ ամերիկյան տարրեր,
ինչից, ըստ նրա, աղավաղվում է հայկական երաժշտությունը: «Հայկական
երաժշտությունը պետք է հնչի միայն ու միայն հայերենով»,- նշեց նա: