ՓՈՓՈԽՈՒԹՅՈՒՆՆԵՐ ԿԿԱՏԱՐՎԵՆ ՔԱՂԱՎԻԱՑԻԱՅԻ ՈԼՈՐՏԻՆ ՎԵՐԱԲԵՐՈՂ
ԵՐԵՍՈՒՆԻՑ ԱՎԵԼԻ ԵՆԹԱՕՐԵՆՍԴՐԱԿԱՆ ՓԱՍՏԱԹՂԹԵՐՈՒՄ
26-04-2007 21:00:00 | Հայաստան | Տնտեսություն
ԵՐԵՎԱՆ, 26 ԱՊՐԻԼԻ, ՆՈՅՅԱՆ ՏԱՊԱՆ: Քաղավիացիային առնչվող
հարցեր են քննարկվել ՀՀ նախագահ Ռոբերտ Քոչարյանի եւ ՀՀ
կառավարությանն առընթեր Քաղաքացիական ավիացիայի գլխավոր վարչության
պետ Արտյոմ Մովսեսյանի ապրիլի 26-ի աշխատանքային հանդիպմանը:
Ա.Մովսեսյանը նախագահին է ներկայացրել «Զվարթնոց»
օդանավակայանի կոնցեսիոների կողմից կատարվող աշխատանքների ընթացքը
եւ տեղեկացրել, որ մայիսի վերջին շահագործման կհանձնվի
օդանավակայանի ուղեւորային նոր համալիրը, որից հետո կոնցեսիոների
հետ կքննարկվի երկրորդ համալիրի կառուցման հարցը:
Խոսվել է նաեւ Ավիացիայի մասին օրենքի նոր խմբագրությամբ
ընդունումից հետո շուրջ 35 ենթաօրենսդրական փաստաթղթերում
փոփոխություններ անելու անհրաժեշտության մասին: Ռ.Քոչարյանը նշել
է, որ դրանք պետք է լինեն կարգապահական եւ կատարողական առումով
բարձրակարգ փաստաթղթեր:
Ըստ ՀՀ նախագահի Մամլո գրասենյակից «ՆՈՅՅԱՆ ՏԱՊԱՆ»-ին
տրամադրած հաղորդագրության, հանդիպմանը անդրադարձ է կատարվել նաեւ
ավիաընկերությունների աշխատանքին առնչվող խնդիրներին:
Նախագահը քննարկված հարցերի շուրջ տվել է հանձնարարականներ: