ՀԱՅԱՍՏԱՆՈՒՄ ԹԱՓՈՒՐ ԱՇԽԱՏԱՏԵՂԵՐԸ ՀԻՄՆԱԿԱՆՈՒՄ ԲԱՆՎՈՐԱԿԱՆՄԱՍՆԱԳԻՏՈՒԹՅՈՒՆՆԵՐԻ ԳԾՈՎ ԵՆ
20-04-2007 18:10:00 | Հայաստան | Հասարակություն
ԵՐԵՎԱՆ, 20 ԱՊՐԻԼԻ, ՆՈՅՅԱՆ ՏԱՊԱՆ: Հայաստանում տնտեսապես
ակտիվ բնակչության միջին թվաքանակը հունվար-փետրվարին կազմել է 1
մլն 170,2 հազար մարդ, որոնցից տնտեսության մեջ զբաղված է եղել
92,8%-ը, կամ 1 մլն 085,6 հազարը: Աշխատանք չունեցող 84,6 հազար
քաղաքացիներ գրանցվել են ՀՀ Աշխատանքի եւ սոցիալական հարցերի
նախարարության «ՀՀ Զբաղվածության ծառայություն» գործակալությունում
եւ ստացել գործազուրկի կարգավիճակ:
ՀՀ Ազգային վիճակագրական ծառայության տվյալների համաձայն,
գործազուրկների 71,9%-ը կազմել են կանայք: Այս ցուցանիշը անցյալ
տարվա նույն ժամանակաշրջանի համեմատ աճել է 1,1%-ով:
Փետրվարին գործատուների կողմից ներկայացվել է 1433 թափուր
աշխատատեղի հայտ, որից 1128-ը` բանվորական, 305-ը` ծառայողական,
141` բժշկի, 19-ը` մանկավարժի մասնագիտությունների գծով:
Տարեսկզբից աշխատանքի է տեղավորվել 1007 մարդ: