ԱՆՎՃԱՐ ԱՄԲՈՒԼԱՏՈՐ ԾԱՌԱՅՈՒԹՅՈՒՆՆԵՐԻՑ ՕԳՏՎԵԼՈՒ ՀԱՄԱՐ ՄԻՆՉԵՎ
ՏԱՐԵՎԵՐՋ ՔԱՂԱՔԱՑԻՆԵՐԸ ՊԵՏՔ Է ԳՐԱՆՑՎԵՆ ԱԱՊ ՀԱՄԱԿԱՐԳՈՒՄ
16-04-2007 17:53:00 | Հայաստան | Հասարակություն
ԾԱՂԿԱՁՈՐ, 16 ԱՊՐԻԼԻ, ՆՈՅՅԱՆ ՏԱՊԱՆ: Հայաստանում առողջության
առաջնային պահպանման (ԱԱՊ) համակարգում ապրիլի 1-ից սկսվել են
բնակչության գրանցման համակարգի ներդմանն ուղղված աշխատանքները:
Դրա շնորհիվ յուրաքանչյուր քաղաքացի հնարավորություն կունենա
ընտրել իր ԱԱՊ բժշկին: Նոր համակարգի շրջանակներում բնակիչները
կարող են գրանցվել ընտանեկան բժիշկների, թերապեւտների, իսկ
անչափահասները` մանկաբույժների մոտ:
Ինչպես ապրիլի 13-ին Ծաղկաձորում կազմակերպված սեմինարի
ժամանակ հայտնեց ՀՀ Առողջապահության նախարարության Առողջության
բարեփոխման եւ բնակչության գրանցման թիմի ղեկավար Գայանե
Ղարագեբակյանը, եթե քաղաքացիները մինչեւ տարեվերջ չգրանցվեն, ապա
կզրկվեն անվճար ամբուլատոր ծառայություններ ստանալու
հնարավորությունից: Ըստ նրա, համակարգը կներդրվի փուլերով. ապրիլի
1-ից հոկտեմբերի 1-ը բնակիչն ԱԱՊ իր բժշկին կընտրի այն
բուժհաստատությունից, որտեղ նա ներկայումս սպասարկվում է, իսկ
հոկտեմբերից 1-ից` ցանկությամբ դեպքում կարող է տարին 2 անգամ
փոխել բժշկին:
Նախարարության Առաջնային բուժօգնության բաժնի պետ Ռուզաննա
Յուզբաշյանը նշեց, որ տարեցտարի աճում են ԱԱՊ համակարգին
պետբյուջեից հատկացվող գումարները: Այսպես, եթե 2005թ.-ին
հատկացվել էր 9,3 մլրդ դրամ, ապա 2007թ.-ին` 16,726 մլրդ դրամ (մոտ
46,5 մլն ԱՄՆ դոլար):