ՓԱՐԻԶ, 4 ԱՊՐԻԼԻ, ՆՈՅՅԱՆ ՏԱՊԱՆ: Ֆրանսիայում Հայաստանի տարվա շրջանակներում Փարիզի Ժամանակակից արվեստի ազգային թանգարանում` Պոմպիդու կենտրոնում, եւ Գալուստ Գյուլբենկյան Մշակութային կենտրոնում ապրիլի 2-ին բացվել են ամերիկահայ մեծ նկարիչ Արշիլ Գորկու (Ոստանիկ Ադոյան, 1904-1948) ստեղծագործությունների ցուցահանդեսները: Ներկայացված են նկարչի քառասունից ավելի կտավներ եւ գծանկարներ, որոնք բերվել են ԱՄՆ-ից, Պորտուգալիայից, Անգլիայից, ինչպես նաեւ Պոմպիդու կենտրոնի եւ առանձին անհատների հավաքածուներից: Ցուցահանդեսների բացմանը մասնակցում էին Ժորժ Պոմպիդու Արվեստի եւ Մշակույթի ազգային կենտրոնի նախագահ Բրունո Ռասինը, Գալուստ Գյուլբենկյան հաստատության Վարչական խորհրդի նախագահ Էմիլիո Լուի Վիլարը (Լիսաբոն) եւ Հայաստանի դեսպան Էդվարդ Նալբանդյանը; Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ ՏԱՊԱՆ»-ին տրամադրած հաղորդագրության, արարողությանը ներկա էին նաեւ Ա.Գորկու կինը, դուստրը եւ թոռները:

---