ՌՈՒԲԵՆ ՔՈՉԱՐԸ ՄԻԱԺԱՄԱՆԱԿ ԱՇԽԱՏՈՒՄ Է ԵՐԿՈՒ` «ՆԱՐԵԿ» ԵՎ
«ԱՅՍՊԻՍԻ ԲԱՆԵՐ» ԳԵՂԱՐՎԵՍՏԱԿԱՆ ՖԻԼՄԵՐԻ ՎՐԱ
31-03-2007 16:00:00 | Հայաստան | Մշակույթ
ԵՐԵՎԱՆ, 31 ՄԱՐՏԻ, ՆՈՅՅԱՆ ՏԱՊԱՆ: Կինոռեժիսոր Ռուբեն Քոչարը
միանգամից սկսել է աշախատել երկու նոր` «Նարեկ» եւ «Այսպիսի բաներ»
հայ-ամերիկյան համատեղ արտադրության գեղարվեստական ֆիլմերի վրա:
«Բլու լայն» ամերիկյան կինոկազմակերպության եւ Հայստանի ազգային
կինոկենտրոնի ֆինանսավորմամբ արդեն սկսվել են ռեժիսորի «Այսպիսի
բաներ» ֆիլմի նկարահանման աշխատանքները, իսկ «Նարեկ» ֆիլմը դեռեւս
գտնվում է նախապատրաստական փուլում:
Այս մասին մարտի 31-ին «Ուրբաթ» ակումբում կայացած հանդիպման
ժամանակ հայտնեց Ռուբեն Քոչարը: Ռեժիսորի խոսքերով, «Այսպիսի
բաներ» ֆիլմում կներկայացվի մի խումբ հայտնի ռեժիսորների` Լյուկ
Բեսոնի, Քվենտին Տարանտինոյի եւ այլոց ֆիլմերի թողած հետեւանքները
երիտասարդության վրա: «Այդ ֆիլմերում բացակայում է իրական կյանքը,
հերոսները շփվում են վիրտուալ աշխարհում, ինչն իր հետ բերում է
անբնական եւ շփոթ իրավիճակ նրանց հոգիներում»,- նշեց հեղինակը:
Ֆիլմի գլխավոր դերերից մեկը մարմնավորելու է Հովհաննես
Բաբախանյանը. դա լինելու է հոգեւորականի դեր, ով եւս վիրտուալ
կյանքում կորցրել է հավատքը եւ հեռացել եկեղեցուց: Ռ.Քոչարը նշեց,
որ այս սեպտեմբերին ֆիլմի վրա կատարվող աշխատանքները կավարտվեն, եւ
պրեմիերան կկայանա ԱՄՆ-ում:
Ռեժիսորը հայտնեց նաեւ, որ «Նարեկ» գեղարվեստական ֆիլմը
դեռեւս գտնվում է նախապատրաստական փուլում. փոփոխվում է սցենարը,
հստակեցված չէ դերասանական կազմը: «Այս ֆիլմը ինձ համար շատ
կարեւոր նշանակություն ունի, քանի որ Գրիգոր Նարեկացին բացառիկ
երեւույթ է: Նրա անձը եւ ստեղծագործությունները ինձ համար
ուղեցույց են: Իմ նպատակն է` այս փորձություններով լի աշխարհում
ներկայացնել Նարեկացու հավատքի առեղծվածն ու կարեւորությունը»,-
ասաց հեղինակը:
«Նարեկ»-ը նկարահանվելու է Հայաստանում, եւ եթե հնարավոր
լինի, նաեւ` Թուրքիայում: