ԲԵԼԱՌՈՒՍՈՒՄ ՄԱՐՏԻ 26-ԻՑ ԱՊՐԻԼԻ 1-Ը ԿԱՆՑԿԱՑՎԵՆ ՀԱՅԱՍՏԱՆԻ
ՄՇԱԿՈՒՅԹԻ ՕՐԵՐ
22-03-2007 20:57:00 | Հայաստան | Մշակույթ
ԵՐԵՎԱՆ, 22 ՄԱՐՏԻ, ՆՈՅՅԱՆ ՏԱՊԱՆ: Բելառուսի
Հանրապետությունում մարտի 26-ից ապրիլի 1-ը կանցկացվեն Հայաստանի
մշակույթի օրեր: 62-հոգանոց հայկական պաշտոնական պատվիրակությունը
կգլխավորի ՀՀ մշակույթի եւ երիտասարդության հարցերի նախարար Հասմիկ
Պողոսյանը: Այս մասին մարտի 22-ի մամլո ասուլիսում հայտնեց
նախարարության արտաքին կապերի վարչության պետ Սուսաննա Խաչատրյանը:
Ս.Խաչատրյանը նշեց, որ Բելառուսի Ազգային գեղարվեստի
թանգարանում կբացվեն գեղանկարիչ Հակոբ Հակոբյանի գործերի
ցուցահանդեսը, Պատմության եւ ազգային թանգարանում` «Հայաստան.
ճարտարապետություն եւ բնապատկեր», Կինոյի տանը` «Արվեստ առանց
սահմանների. Սերգեյ Փարաջանովի աշխարհը» խորագրով լուսանկարչական
ցուցահանդեսները: Բելառուսի տարբեր քաղաքներում հանդես կգան
Մնջախաղի եւ Կամերային թատրոնների կոլեկտիվները, իսկ Մինսկի Կինոյի
տանը տեղի կունենան «Հայկական կինոյի օրեր»:
Մինսկում Հայաստանի մշակույթի օրերի հանդիսավոր բացման գալա
համերգին կմասնակցեն «Բարեկամություն» անսամբլի վարպետները,
երգչուհիներ Ինգա եւ Անուշ Արշակյանները եւ Բելառուսում անցկացվող
«Սլավյանսկի բազար» արվեստների միջազգային փառատոնի մասնակից հայ
երգիչները:
Ս.Խաչատրյանը հայտնեց նաեւ, որ Բելառուսում մշակույթի օրերի
շրջանակներում տեղի կունենան երկու երկրների մշակույթի նախարարների
աշխատանքային հանդիպումներ, համատեղ ասուլիս, ինչպես նաեւ մի շարք
հանդիպումներ տեղի հայ համայնքի ներկայացուցիչների հետ: