ՀԵՌԱԽՈՍԱԳԾԱՅԻՆ ՄԻԱՑՈՒՄՈՎ ԻՆՏԵՐՆԵՏԻՑ ՕԳՏՎՈՂ ԵՎՍ 400
ԲԱԺԱՆՈՐԴՆԵՐ ՍՏԱՑԵԼ ԵՆ ՉԿԱՏԱՐՎԱԾ ԶԱՆԳԻ ԴԻՄԱՑ ՎՃԱՐԵԼՈՒ ՀԱՇԻՎՆԵՐ
16-03-2007 20:00:00 | Հայաստան | Տնտեսություն
ԵՐԵՎԱՆ, 16 ՄԱՐՏԻ, ՆՈՅՅԱՆ ՏԱՊԱՆ: Հեռախոսագծային միացումով
ինտերնետից օգտվող մոտ 400 բաժանորդներ «Արմենտել»-ից վերջին մի
քանի ամսում ստացել են չկատարված միջազգային հեռախոսազանգերի դիմաց
վճարելու հաշիվներ: Այս մասին «ՆՈՅՅԱՆ ՏԱՊԱՆ»-ի թղթակցի հետ
զրույցում հայտնեց «Սպառողների իրավունքների պաշտպանություն»
հասարակական կազմակերպության նախագահ Աբգար Եղոյանը` հիշեցնելով,
որ 2006թ.-ի մայիսին եւս շուրջ 400 բաժանորդների նման հաշիվներ
անվավեր են ճանաչվել դատարանի որոշմամբ:
Նրա խոսքերով, նման դեպքերի կրկնության պատճառն այն է, որ
«Արմենտել»-ը լավ չի կազմակերպել հեռախոսագծային միացումով
ինտերնետից օգտվող բաժանորդների իրազեկումը, որպեսզի նրանք
կոդավորումով արգելափակեն իրենց համակարգիչը անհարկի հեռախոսային
միացումներից: Նշված դեպքերն արձանագրվում են այն ժամանակ, երբ
որոշ կայքէջեր մուտքից հետո միանում է միջազգային հեռախոսազանգի
ծրագիրը:
Նշվեց, որ «Սպառողների իրավունքների պաշտպանություն» ՀԿ-ն 8
պրովայդերների առաջարկել է ինտերնետ միացման ծառայությունների
բաժանորդների հետ կնքվող պայմանագրերում, ինչպես նաեւ ծառայության
դիմաց վճարման քարտերում ներառնել նշված վտանգի մասին
նախազգուշացնող եւ արգելափակման եղանակը նկարագրող կետ: Ըստ
Ա.Եղոյանի, «Արմինկո» ընկերությունն արդեն իսկ հայտնել է նման
պատրաստակամություն, ինչպես նաեւ` մտադիր է հրատարակել
համապատասխան նախազգուշացմամբ պաստառ: «Սպառողների իրավունքների
պաշտպանություն» ՀԿ-ն իր հերթին աշխատանքներ է տանում
նախազգուշացնող պաստառների տպագրման համար միջոցներ հայթայթելու
ուղղությամբ: