ԳՐԱԿԱՆ ՀԱՍԱՐԱԿԱՅՆՈՒԹՅՈՒՆԸ ՆՇԵՑ ԵՂԻՇԵ ՉԱՐԵՆՑԻ ԾՆՆԴՅԱՆ
110-ԱՄՅԱԿԸ
13-03-2007 17:35:00 | Հայաստան | Մշակույթ
ԵՐԵՎԱՆ, 13 ՄԱՐՏԻ, ՆՈՅՅԱՆ ՏԱՊԱՆ: Մարտի 13-ին լրացավ մեծ
բանաստեղծ Եղիշե Չարենցի 110-ամյակը: Ինչպես ամեն տարի, այս տարի
եւս հայ մտավորականության ներկայացուցիչները, ուսանողությունն ու
դպրոցականները այցելեցին մեծ բանաստեղծի հուշահամալիր եւ հարգանքի
տուրք մատուցեցին նրա հիշատակին: Հուշարձանի մոտ անցկացվեցին
չարենցյան ընթերցումներ:
Չարենցի տուն-թանգարանի տնօրեն Լիլիթ Հակոբյանը հայտնեց, որ
բանաստեղծի 110-ամյակի կապակցությամբ թանգարանում կբացվի
«Ժողովուրդը Չարենցին» խորագրով ցուցահանդեսը: Ամբողջ տարվա
ընթացքում բազմաթիվ միջոցառումներ կկազմակերպվեն Հայաստանում եւ
Արցախում, իսկ Ռուսաստանի Գրողների միության նախաձեռնությամբ հայ
բանաստեղծի հոբելյանը մեծ շուքով կնշվի նաեւ Ռուսաստանում:
Հոբելյանի կապակցությամբ «Հայագիտակ» հրատարակչության եւ
բանաստեղծի դստեր` Անահիտ Չարենցի, նախաձեռնությամբ առաջիկայում
լույս կտեսնի բանաստեղծի «Հատընտիր»-ը, որում կընդգրկվեն նաեւ
անտիպ գործեր:
Լ.Հակոբյանը հայտնեց նաեւ, որ Չարենցի հոբելյանը մեծ
հանդիսությամբ նշելու առաջարկով դիմել են ՀՀ կառավարություն,
սակայն իրենց մերժել են` պատճառաբանելով, թե 110-ամյակը
հոբելյանական չի համարվում: «Եթե Ուկրաինայում ամեն տարի
Շեւչենկոյի ծննդյան օրը համարում են հոբելյանական, ապա ինչու մենք
մեր հանճարին չենք կարող մեծարել ըստ արժանվույն»,- ասաց
Լ.Հակոբյանը:
Հայաստանի Գրողների միության նախագահ Լեւոն Անանյանի
խոսքերով, Չարենցն իր ստեղծագործության մեջ կարողացավ համախմբել
հայ ժողովրդի անցյալը, ներկան եւ գալիքը: «Այս տարի լրանում է
Չարենցի ծննդյան 110-ամյակը եւ եղերական վախճանի 70-ամյակը:
2007թ.-ը հռչակելով Չարենցյան տարի, մենք պետք է ամեն ինչ անենք,
որպեսզի երիտասարդությանը վերադարձնենք գրական արժեքները, ինչպես
նաեւ մեծն բանաստեղծի պոեզիան նորովի մատուցենք միջազգային
հանրությանը»,- ասաց Լ.Անանյանը:
Անահիտ Չարենցի խոսքերով, թեեւ բանաստեղծի կյանքը տեւեց
ընդամենը 40 տարի, սակայն դա սովորական կյանք չէր, այլ մեծ
բանաստեղծի «մրրկոտ 40-ամյակ», որն ընդատվեց իր արարչական գործի
ճանապարհի կեսին: «Չարենցի կյանքը եղավ անանձնական նվիրում իր
ժողովրդին, իր հայրենքին: Հայ Ժողովուրդը պաշտում էր բանաստեղծին,
իսկ բանաստեղծը` ժողովրդին: Չարենցը հավատում էր իր ժողովրդի
գալիքին: Դրանով է միշտ կենդանի Չարենցը, դրանով է նա լինելու
սերունդների ուղեկիցը»,- նշեց բանաստեղծի դուստրը: