ՖԻՆԱՆՍԱԿԱՆ ԾԱՌԱՅՈՒԹՅՈՒՆՆԵՐԻ ՄԱՍԻՆ ՀՀ ՕՐԵՆՍԴՐՈՒԹՅՈՒՆԸ
ՀԱՄԱՊԱՏԱՍԽԱՆԵՑՎՈՒՄ Է ԵՎՐՈՄԻՈՒԹՅԱՆ ՕՐԵՆՍԴՐՈՒԹՅԱՆԸ
27-02-2007 21:00:00 | Հայաստան | Տնտեսություն
ԵՐԵՎԱՆ, 27 ՓԵՏՐՎԱՐԻ, ՆՈՅՅԱՆ ՏԱՊԱՆ: Փետրվարի 27-ին ՀՀ
Ազգային Ժողովն ընդունեց նախօրեին քննարկված 15 օրինագծերն ու
օրենսդրական փաթեթները, որոնց գերակշռող մասով փոփոխություններ եւ
լրացումներ են կատարվում գործող օրենքներում:
Մասնավորապես, Վարչական իրավախախտումների վերաբերյալ
օրենսգրքում 1-ին ընթերցմամբ ընդունված փոփոխությամբ ուժը կորցրած
է ճանաչվում զենքով ընտրական տեղամասային կենտրոն մուտք գործելու
վերաբերյալ հոդվածը, քանի որ նույն արարքի համար պատիժ է սահմանված
նաեւ ՀՀ Քրեական օրենսգրքով:
«Մթնոլորտային պահպանության մասին» օրենքում 1-ին ընթերցմամբ
ընդունված լրացմամբ հստակեցվում են շինարարություն իրականացնող
կազմակերպությունների պարտավորությունները` շինարարության
ընթացքում փոշու արտանետումները կանխարգելելու նպատակով:
ՀՀ Քրեական օրենսգրքում 1-ին ընթերցմամբ ընդունված
փոփոխություններով բարձրացվում են ապօրինի անտառահատումների համար
սահմանված նվազագույն պատժի` տուգանքների, չափերը:
1-ին ընթերցմամբ ընդունվեցին նաեւ «Որսի կենդանիների
պահպանության, պաշտպանության, տնտեսության եւ որսի վարման մասին»,
«Օրգանական գյուղատնտեսության մասին» օրինագծերը, 2-րդ ընթերցմամբ`
«Ապահովագրության եւ ապահովագրական գործունեության մասին»
օրինագծերի փաթեթը, մասնավորապես, ֆինանսական ծառայությունների
վերաբերյալ ՀՀ օրենսդրությունը համապատասխանեցվում է Եվրոմիության
օրենսդրությանը, 3-րդ ընթերցմամբ եւ ամբողջությամբ` «Գործատուների
միությունների մասին» օրինագիծը: