ՍՏՈՐԱԳՐՎԵԼ Է ՀԱՄԱՁԱՅՆԱԳԻՐ ԵՐԵՎԱՆԸ ԵՎ ԼՈՍ ԱՆՋԵԼԵՍԸ ՔՈՒՅՐ
ՔԱՂԱՔՆԵՐ ՀՌՉԱԿԵԼՈՒ ՄԱՍԻՆ
27-02-2007 18:45:00 | ԱՄՆ | Հասարակություն
ԼՈՍ ԱՆՋԵԼԵՍ, 27 ՓԵՏՐՎԱՐԻ, ՆՈՅՅԱՆ ՏԱՊԱՆ: Երեւանը եւ Լոս
Անջելեսը քույր քաղաքներ հռչակելու մասին համաձայնագրի ստորագրման
հանդիսավոր արարողությանը մասնակցելու նպատակով փետրվարի 20-24-ին
Լոս Անջելեսում էր գտնվում Երեւանի քաղաքապետ Երվանդ Զախարյանի
գլխավորած պատվիրակությունը: Ըստ ՀՀ ԱԳՆ Մամուլի եւ տեղեկատվության
վարչությունից «ՆՈՅՅԱՆ ՏԱՊԱՆ»-ին տրամադրած հաղորդագրության,
Երեւանը եւ Լոս Անջելեսը քույր քաղաքներ հռչակելու մասին
համաձայնագրի ստորագրման հանդիսավոր արարողությունը տեղի ունեցել
Լոս Անջելեսի քաղաքային խորհրդի փետրվարի 23-ի նիստում:
Լոս Անջելեսի քաղաքապետ Անտոնիո Վիլարայգոսան վստահություն է
հայտնել, որ այդ համաձայնագիրը նոր խթան կհաղորդի հայաշատ Լոս
Անջելեսի եւ Երեւանի միջեւ փոխգործակցության խորացմանը եւ փորձի
փոխանակմանը: Նա նաեւ կարեւորել է բազմազգ եւ բազմամշակույթ Լոս
Անջելեսում հայերի անգնահատելի ավանդը:
Ե.Զախարյանն իր խոսքում նշել է, որ համաձայնագիրը ենթադրում է
երկու քաղաքների ավելի սերտ համագործակցություն նորագույն
տեխնոլոգիաների եւ հասարակական կառավարման ոլորտներում, առեւտրային
հարաբերությունների աճ, ավելի սերտ տնտեսական, մշակութային,
գիտական, կրթական կապեր: