«Տաշիրը» «Սոգլասիե»-ից գնել է «Մոսկվա-Սիթիի»
հյուրանոցա-գրասենյակային կենտրոնի նախագծի 50% բաժնեմասը
28-12-2009 16:55:00 | Ռուսաստան | Տնտեսություն
ՄՈՍԿՎԱ, 28 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: «Տաշիր»
ընկերությունների խումբը «Սոգլասիե» ՓԲԸ-ից գնել է 70 հազ.
քառ.մետր ընդհանուր մակերեսով հյուրանոցա-գրասենյակային նախագծի 50
% բաժնեմասը, որն իրականացվում է «Մոսկվա-Սիթիի» կենտրոնական
միջուկի 8ա տեղամասում: Այս մասին հաղորդում է «Երկրամասը»:
«Տաշիրը» եւ «Սոգլասիե» ՓԲԸ-ն միասին են իրականացնելու
հյուրանոցա-գրասենյակային կենտրոնի նախագիծը, որի բաժնեմասերը
բաշխված են 50:50 հարաբերակցությամբ: «Տաշիր» ԸԽ-ն կավարտի
շինարարական աշխատանքները, կհանձնի եւ հետո կշահագործի օբյեկտը:
Կենտրոնի շինարարության մեջ ընդհանուր ներդրումները կկազմեն 100
մլն. դոլար:
Հյուրանոցը կկառավարի Novotel միջազգային օպերատորը:
8ա տեղամասում շինարարության ներդրող-պատվիրատուն «Մերկուրի»
ԲԲԸ-ն է, որը մտնում է «Սոգլասիե» ՓԲԸ-ի մեջ: Գլխավոր կապալառուն`
«Սոգլասիե Ստրոյինվեստ» կորպորացիա» ՓԲԸ-ն: «Տաշիր» ԸԽ
սեփականատերը եւ նախագահը գործարար Սամվել Կարապետյանն է: Ըստ
շուկայական տվյալների, «Սոգլասիե» ՓԲԸ-ի սեփականատերը Ռուսաստանի
հայերի միության ղեկավար Արա Աբրահամյանն է:
Բացումը ծրագրվում է 2010 թվականի IV եռամսյակին:
Ռուսական «Տաշիր գրուպը», որ հիմնվել է 1999 թվականին, այսօր
միավորում է ավելի քան 200 ընկերություններ, որոնք գործում են
տնտեսական տարբեր ոլորտներում եւ ընդհանուր առմամբ ունեն 30
հազարից ավելի աշխատակիցներ: «Տաշիր գրուպի» բիզնեսի հիմքում
առեւտրային անշարժ գույքի զարգացում-ընդլայնումն է: 2009 թվականի
վերջի տվյալներով «Տաշիր գրուպը» կառուցել եւ կառավարում է ավելի
քան 60 առեւտրական, գրասենյակային եւ պահեստավորման անշարժ գույքի
օբյեկտներ ավելի քան 900 հազ. քառ. մ ընդհանուր մակերեսով: