Անցկացվել է Հեռուստատեսության եւ ռադիոյի ազգային
հանձնաժողովի անդամների չորս թափուր տեղերի համար հայտարարված
մրցույթը
27-11-2009 20:24:00 | Հայաստան | Հասարակություն
ԵՐԵՎԱՆ, 27 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայաստանի Ազգայիա
Ժողովում նոյեմբերի 27-ին անցկացվել է Հեռուստատեսության եւ
ռադիոյի ազգային հանձնաժողովի անդամների չորս թափուր տեղերի համար
հայտարարված մրցույթը:
«Հեռուստատեսության եւ ռադիոյի մասին» օրենքում կատարված
փոփոխությունների եւ ԱԺ կանոնակարգի համաձայն` Ազգային ժողովի
անդամների կեսին այսուհետեւ մրցութային կարգով եւ վեց տարի
ժամկետով ընտրելու է Ազգային ժողովը, իսկ մյուս կեսին` կրկին վեց
տարի ժամկետով, նշանակելու է հանրապետության նախագահը:
Համամասնորեն խորհրդարանի քաղաքական ուժերը ներկայացնող
մրցութային հանձնաժողովը կազմված է 6 անդամներից. Սուրեն
Գեւորգյանը, ով նաեւ հանձնաժողովի նախագահն է, եւ Կարեն Աղամյանը
ներկայացնում են ՀՀԿ-ն, Արամ Հովհաննիսյանը` «Բարգավաճ Հայաստան»
կուսակցությունը, Մանվել Մկրտչյանը` ՀՅԴ կուսակցությունը,
Լյուդմիլա Մելիքյանը` ՕԵԿ-ը, Ալեն Սիմոնյանը` «Ժառանգություն»
կուսակցությունը:
Մրցույթին մասնակցում էին 8 թեկնածու` Կարեն Վարդանյանը, Հայկ
Քոթանյանը, Գեւորգ Հարությունյանը, Գոհարիկ Արշակյանը, Կորյուն
Առաքելյանը, Արմեն Մկրտչյանը, Արամ Մելքոնյանը եւ Սպարտակ
Ղարաբաղցյանը: Երկու` թեսթային եւ բանավոր փուլով անցկացվող
մրցույթի արդյունքում հաղթող ճանաչված մասնակիցները ԱԺ առաջիկա
քառօրյայի ընթացքում կներկայացվեն պատգամավորներին, եւ Ազգային
ժողովը որոշմամբ կընտրի հանձնաժողովի անդամներին:
Թեսթային փուլում մրցույթի բոլոր մասնակիցները, բացառությամբ
Սպարտակ Ղարաբաղցյանի, հաղթահարեցին անհրաժեշտ միավորների 90
տոկոսանոց շեմը եւ կներկայացվեն խորհրդարանի ընտությանը:
Մրցույթում հաղթած յոթ մասնակիցներն անցան նաեւ հարցազրույցի
փուլը:
ՀՀ ԱԺ-ի հաղորդագրությունում նշվում է, որ բանավոր փուլի
արդյունքները թեեւ պատգամավորներին կօգնեն կողմնորոշվել
ընտրություն կատարելիս, բայց թեսթերի արդյունքների վրա որեւէ
ազդեցություն չունեն: