Հայաստանի 2010թ.-ի պետբյուջեի նախագծով Արտգործնախարարության
պահպանման ծախսերի համար նախատեսված է 885,2 մլն դրամ
05-11-2009 18:38:00 | Հայաստան | Տնտեսություն
ԵՐԵՎԱՆ, 5 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայաստանի 2010թ.-ի
պետբյուջեի նախագծով ՀՀ արտգործնախարարության ֆինանսավորումն
իրականացվելու է 4 հիմնական ուղղություններով. ապարատի պահպանման
ծախսեր` 855,2 մլն դրամ, ՀՀ դեսպանությունների եւ
ներկայացուցչությունների պահպանման ծախսեր` շուրջ 4, 67 մլրդ դրամ,
ԱԳՆ-ի աշխատակազմի «Պետական արարողակարգի ծառայություն»
գործակալության պահպանման ծախսեր` 123 մլն դրամ, միջազգային
կազմակերպություններին Հայաստանի անդամակցության վճարներ` 1,07
մլրդ դրամ: Այս մասին ՀՀ Ազգային Ժողովի մշտական հանձնաժողովների
նոյեմբերի 5-ի համատեղ նիստում հայտնեց ֆինանսների նախարարի առաջին
տեղակալ Պավել Սաֆարյանը:
Ըստ նրա, ԱԳՆ-ի պահպանման 2010թ.-ի ծախսերը ձեւավորվել են
2009թ.-ի սկզբունքով: Սակայն, հաշվի առնելով դիվանագիտական երկու
լրացուցիչ հաստիքների անհրաժեշտությունը, 2009թ.-ի համեմատ ծախսերն
ավելացվել են շուրջ 2 մլն դրամի չափով:
Նշվեց նաեւ, որ ՀՀ դեսպանությունների եւ
ներկայացուցչությունների պահպանման ծրագրով նախատեսված
ֆինանսավորումն ենթակա է վերանայման, ինչը պայմանավորված է
դրամ/եվրո եւ դրամ/ԱՄՆ դոլար փոխարժեքների փոփոխությամբ: ԱԳՆ-ի
խնդրանքով ներկայումս տարվում են աշխատանքներ, որոնց նպատակն է
ավելացնել այս ծրագրով ֆինանսավորումն այնքան, որպեսզի արտերկրում
Հայաստանի դիվանագիտական կորպուսի ամսական աշխատավարձերի չափերը
համապատասխանեցվեց 2009թ-ի մակարդակին: Արտերկում 2010թ.-ին նոր
դեսպանության բացման ծրագիր նախատեսված չէ:
«Պետական արարողակարգի ծառայություն» գործակալության
պահպանման ծախսերը 2009թ.-ի նկատմամբ նվազել են շուրջ 17,3 մլն
դրամով, այդ թվում, գործուղումների եւ շրջագայությունների ծախսերի
մասով` 14,3 մլն դրամով, կապի ծառայությունների մասով` 3 մլն
դրամով:
Միջազգային կազմակերպություններին Հայաստանի անդամակցության
վճարների համար նախատեսված 1,07 մլրդ դրամից 832 մլն դրամն
ուղղվելու է 76 միջազգային կազմակերպություններին անդամավճարների
գծով ընթացիկ պարտավորությունների կատարմանը, իսկ 239 մլն դրամը`
նախորդ տարիներին կուտակված պարտքերի մարմանը:
Ինչպես հայտնեց Պ.Սաֆարյանը, 5-6 տարի առաջ Հայաստանի արտաքին
պարտավորություններն անհամեմատ ավելի մեծ էին եւ 19-20 մլն ԱՄՆ
դոլարի էին հասնում: Այնուհետեւ միջազգային կազմակերպությունների
եւ ՀՀ ԱԳՆ-ի «ինտենսիվ, արդյունավետ աշխատանքի շնորհիվ համատեղ
մշակվեցին պարտավորությունների մարման ժամանակացույցեր»: Նշվեց, որ
այսօրվա դրությամբ պարտավորությունների գումարը կազմում է 8,47 մլն
ԱՄՆ դոլար, եւ վերակնքված ժամանակացույցի համաձայն, Հայաստանը
պարտավոր է 2010թ.-ին այնքան գումար, ինչքան որ նախատեսվել է
պետբյուջեի նախագծով:
Բյուջեի նախագծի հիմքում դրված է 1 ԱՄՆ դոլարի դիմաց 376 ՀՀ
դրամ հաշվարկային փոխարժեքը: