Էթիլային սպիրտի շուկայում «Սալեքս Գրուփ» ընկերությունը
ճանաչվեց գերիշխող դիրք ունեցող
24-09-2009 19:14:00 | Հայաստան | Տնտեսություն
ԵՐԵՎԱՆ, 24 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Տնտեսական
մրցակցության պաշտպանության պետհանձնաժողովի սեպտեմբերի 24-ի
նիստում «Ալեքս Գրիգ» ընկերությունը գրանցվեց էթիլային սպիրտի
շուկայում գերիշխողների գրանցամատյանում, իսկ «Սալեքս Գրուփը»
հանվեց գրանցամատյանից: «Սալեքս Գրուփ»-ը գերիշխող դիրք ունեցող էր
ճանաչվել 2006թ.-ի տվյալներով եւ գրավել է շուկայի 91%-ը:
2008թ.-ին էթիլային սպիրտի ներկրում է իրականացրել 5
տնտեսվարող` 200 095,7 լիտր ծավալով: Ներկրված սպիրտի 98,27%-ը
ներկրվել է «Արաբկիր Ալկո» լիկյորի-օղու գործարանի կողմից:
Ներկրում իրականացրած մնացած 4 տնտեսվարողները ներկրված սպիրտը
օգտագործել են սեփական արտադրությունում:
Հանձնաժողովի ուսումնասիրությամբ, 2008թ.-ին սպիրտի ներկրում,
արտադրություն եւ իրացում է իրականացրել 14 տնտեսվարող (3-ը`
իրացնող են): Ըստ նրանց ներկայացրած տեղեկատվության, Հայաստանում
էթիլային սպիրտի արտադրության ծավալը 2008թ.-ի 2-րդ կիսամյակում
կազմել է 1 885 280,9 լիտր, որի 78,8%-ը արտադրել է «Ալեքս Գրիգ»
ընկերությունը, 0,07%-ը` «Գրանդ Ալկո»-ն, իսկ «Վեդի Ալկո»,
«Էրեբունի» գինու եւ կոնյակի գործարաները, «Առաքել Ալկո» եւ
«Շահումյան Վին» ընկերությունները արտադրել է 13,6%-ը: Արտադրված
էթիլային սպիրտի 64%-ը օգտագործվել է սեփական արտադրության մեջ:
Էթիլային սպիրտի շուկայում իրացման առավել մեծ ծավալ ունի «Ալեքս
Գրիգ»-ը` 99,88%:
Մեկ լիտր էթիլային սպիրտի արտադրության համար, ըստ շուկայի
տնտեսվարողների տեղեկատվության, օգտագործվում է մոտավորապես 3 կգ
ցորեն, որը ձեռք է բերվում 1 կգ-ը 80-100 դրամով: Մեկ լիտր ցորենի
սպիրտի արտադրության արժեքը կազմում է միջինը 300-400 դրամ (մոտ 1
ԱՄՆ դոլար): Ակցիզային հարկի դրույքաչափը մեկ լիտր էթիլային սպիրտի
(100 տոկոսանոց) համար 600 դրամ է: Էթիլային սպիրտի իրացման միջին
գինը կազմել է մեկ լիտրը 1202 դրամ: