ԵՐԵՎԱՆ, 22 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Հայաստանի
առաջին Հանրապետության հիմնադիր Արամ Մանուկյանի ծննդյան
130-ամյակի տոնակատարությունների շրջանակում սեպտեմբերի 22-ին, ՀՀ
ԳԱԱ պատմության ինստիտուտում կազմակերպվեց «Արամ Մանուկյան-130»
համահայկական գիտաժողովը:
ՀՀ սփյուռքի նախարարությունից ստացված հաղորդագրության
համաձայն, միջոցառման բացման խոսքով հանդես եկավ ՀՀ ԳԱԱ պատմության
ինստիտուտի տնօրեն, ՀՀ ԳԱԱ թղթակից անդամ Աշոտ Մելքոնյանը,
ողջույնի խոսքով` ակադեմիկոս Վլադիմիր Բարխուդարյանը, Երեւանի
պետական համալսարանի ռեկտոր Արամ Սիմոնյանը, ընթերցվեց ՀՀ սփյուռքի
նախարար Հրանուշ Հակոբյանի ողջույնի ուղերձը:
Գիտաժողովի առաջին նիստը նախագահեց Ա.Մելքոնյանը:
Ներկայացվեցին «Հայոց պետականության հիմնադիր հայրերը. Արամ
Մանուկյան, Ռոստոմ», «Արամը Վանի 1915թ. ինքնապաշտպանության
կազմակերպիչ եւ ղեկավար», «Արամ Մանուկյանը Վանի նահանգապետ» եւ
«Հայաստանի առաջին հանրապետության անդրանիկ կառավարության
ձեւավորումը» թեմաներով զեկուցումները: Երկրորդ նիստի (նախագահեց
Ա.Սիմոնյանը) թեմաներն էին` «Արամ Մանուկյանի դիրքորոշումը Բաթումի
պայմանագրի նկատմամբ», «Արամ Մանուկյանը Հայաստանի առաջին
հանրապետության հիմնադիր», «Արամ Մանուկյանի պետական
գործունեությունը» եւ «Արամ Մանուկյանի գործունեությունը Հայաստանի
առաջին հանրապետության տարիներին»: Գիտաժողովի երկու նիստերն
ավարտվեցին քննարկումներով:
Գիտաժողովի մասնակիցներին հանձնվեց Արամ Ասրյանի «Արամ
Մանուկյան. կյանքը եւ գործունեությունը» գիրքը, ուր ներկայացված է
ականավոր ազգային-քաղաքական գործչի ու պետական գործչի կյանքը եւ
գործունեությունը: Պատմագիտական աշխատությունը իրականացվել է
արխիվային վավերագրերի, այն տարիների մամուլի եւ այլ սկզբնաղբյուրների,
հուշագրական եւ պատմագիտական տարաբնույթ գրականության հիման վրա:
«Արամ Մանուկյան-130» գիտաժողովը կազմակերպել էին ՀՀ սփյուռքի
նախարարությունը, ՀՀ ԳԱԱ պատմության ինստիտուտը, Երեւանի պետական
համալսարանը եւ Հայաստանի ազգային արխիվը: