Մինսկում նշել են Հայաստանի Հանրապետության Անկախության օրը
22-09-2009 19:25:00 | Բելոռուս | Մշակույթ
ՄԻՆՍԿ, 22 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Սեպտեմբերի 17-ին Մինսկի Երաժշտության ակադեմիայի համերգասրահում
կայացել է համերգ` նվիրված Հայաստանի Հանրապետության Անկախության
օրվան: Այն գործընկեր բուհերի` Բելոռուսիայի պետական երաժշտական
ակադեմիայի եւ Երեւանի Կոմիտասի անվան պետական կոնսերվատորիայի
ստեղծագործական նախագիծն էր:
Համերգը կազմակերպել է Բելոռուսիայի պետական երաժշտականւ
ակադեմիայի դոցենտ Վալտեր Մնացականովը, որը դիրիժոր է աշխատել
Չելյաբինսկի եւ Սամարղանդի, Գրոզնու եւ Օմսկի թատրոններում: Այժմ
Վալտեր Մնացականովը Բելոռուսիայի պետական երաժշտական ակադեմիայի
օպերային ստուդիայի դիրիժորն է:
Ինչպես հաղորդում է Ռուսաստանի հայերի «Երկրամաս» թերթը,
վկայակոչելով Բելառուսի հայերի վեբ-պորտալը, համերգը բացվել է Նինո
Ռոտի կինֆիլմերի երաժշտության հիման վրա սիմֆոնիկ նվագախմբի համար
գրված ֆանտազիայով, որից հետո հնչել է Արամ Խաչատրյանի ջութակի
կոնցերտը: Այնուհետեւ ելույթ է ունեցել միջազգային մրցույթների
դափնեկիր, Բելոռուսիայի պետական երաժշտական ակադեմիայի
նվագախմբային ֆակուլտետի մագիստրատուրայի ուսանողուհի Տատյանա
Կորմազինովան` կատարելով Ժան-Պիեռ Ռամպալի ֆլեյտայի համար
փոխադրությունը: Համերգի առաջին բաժինը փակել է Առնո Բաբաջանյանի
«Հերոսական բալլադը» ֆլեյտայի եւ նվագախմբի համար: Մենակատարն էր
միջազգային մրցույթների դափնեկիր, Երեւանի Կոմիտասի անվան
կոնսերվատորիայի ուսանողուհի Սոնա Բարսեղյանը: «Հերոսական բալլադը»
առաջին անգամ է կատարվել Մինսկում: Բոլոր կատարումների ժամանակ
հանդես է եկել Բելառուսի Հանրապետության ազգային պետական
հեռուստառադիոընկերության սիմֆոնիկ նվագախումբը:
Երկրորդ բաժինը սկսվել է հայ հեղինակների չորս
ստեղծագործություններով` Արամ Խաչատրյան, «Տոկատա դաշնամուրի
համար», Սայաթ-Նովա - Գ. Սարաջյան, «Քանի վուր ջան իմ»,
Կոմիտաս-Անդրեասյան, «Գարուն ա», Կոմիտաս - Գ. Սարաջյան,
«Հաբրբան»: Բոլոր չորս կոմպոզիցիաները կատարել է Երեւանի Կոմիտասի
անվան պետական կոնսերվատորիայի պրոֆեսոր Արմինե Գրիգորյանը: Հետո
հնչել են բելոռուս հեղինակների ստեղծագործություններ` Ա.
Տուրենկով, «Մեղեդի», Վ. Մնացականով, «Չապլինապատում», «Թիթեռնիկ»:
Կատարող` միջազգային մրցույթների դափնեկիր, Բելոռուսիայի պետական
երաժշտական ակադեմիային կից Հանրապետական երաժշտական ուսումնարանի
երրորդ կուրսի սովորող, կլարնետահար Կիրիլ Տելեպնեւը: Դաշնամուրի
պարտիան կատարել է միջազգային մրցույթների դիպլոմանտ Իրինա
Տելեպնեւան: Համերգը ավարտել են Ա. Հարությունյանի եւ Ա.
Բաբաջանյանի «Կոնցերտային ռապսոդիան երկու դաշնամուրի համար»,
ինչպես նաեւ Կոմիտասի եւ Գ. Սարաջյանի «Վաղարշապատի պարը» Արմինե
Գրիգորյան եւ Սոնա Բարսեղյան դաշնամուրային զույգի կատարմամբ: