Հայաստանի տնտեսությունում արդեն նկատելի են կառավարության
հակաճգնաժամային միջոցառումների արդյունքները
21-07-2009 20:50:00 | Հայաստան | Տնտեսություն
ԵՐԵՎԱՆ, 21 ՀՈՒԼԻՍԻ, ՆՈՅՅԱՆ ՏԱՊԱՆ: Հայաստանի տնտեսության մեջ
արդեն նկատելի են կառավարության կողմից իրականացվող
հակաճգնաժամային միջոցառումների արդյունքները: Հուլիսի 21-ին
«Ասպար ուայլդ տուր» զբոսաշրջային ընկերություն կատարած այցից հետո
լրագրողների հետ ճեպազրույցում այս մասին ասաց ՀՀ վարչապետ Տիգրան
Սարգսյանը: Ըստ վարչապետի, դա նկատվում է առաջին հերթին
շինարարության ոլորտում իրականացվող ծրագրերի արդյունքում. մեկ
ամսվա ընթացքում ոլորտում ծավալներն աճել են շուրջ 230%-ով, ինչի
արդյունքում էլ տնտեսական անկման ցուցանիշերը նվազել են:
Որոշակիորեն աճել են նաեւ ապրանքաշրջանառության ծավալները:
Դեռեւս պահպանվում է անկումը գյուղատնտեսության ոլորտում, սակայն
այստեղ նույնպես անկման տեմպը նվազում է, ինչը պայմանավորված է
նաեւ սեզոնայնությամբ: Տ.Սարգսյանը հույս հայտնեց, որ օգոստոսին
գյուղատնտեսության ոլորտում աճի տեմպերը կլինեն ավելի բարձր: Նա
միաժամանակ նշեց, որ անկման աստիճանը սպասվածից ավելի փոքր է եղել:
Տ.Սարգսյանի գնահատմամբ, այս տարեվերջին ակնկալվում է
տնտեսական անկման միտումների ավարտ: Անկման երեւույթների նվազումը
պետք է սկսվի արդեն այս ամսվանից: «Մեր հակաճգնաժամային ծրագիրը
շատ պարզ է, եւ մենք պետք է հետեւողական լինենք դրանց իրականացման
գործում»,- ասաց վարչապետը: