Հայաստանի կառավարության Օպերատիվ շտաբի միջոցով 24 նախագծեր
ստացել են 17 մլրդ դրամի աջակցություն
08-07-2009 19:10:00 | Հայաստան | Տնտեսություն
ԵՐԵՎԱՆ, 8 ՀՈՒԼԻՍԻ, ՆՈՅՅԱՆ ՏԱՊԱՆ: Հայաստանի կառավարության
կողմից համաշխարհային ճգնաժամի հաղթահարմանն ուղղված քայլերից է
տնտեսության անկման կասեցումը եւ արդյունավետ զարգացման համար
հիմքերի ստեղծումը: Այս մասին հուլիսի 8-ին «Գլոբալ տնտեսական
ճգնաժամի ազդեցությունը Հայաստանի վրա. կարճաժամկետ եւ
երկարաժամկետ հեռնկարներ» թեմայով միջազգային եռօրյա համաժողովում
հայտնեց ՀՀ էկոնոմիկայի փոխնախարար Մուշեղ Թումասյանը:
Ըստ նրա, հակաճգնաժամային փաթեթը իր մեջ ներառում է
տնտեսության զարգացմանը նպաստող ներդրումային ծրագրեր,
աջակցություն գործարարության եւ առանձին ոլորտների, խոշոր
ենթակառուցվածքների, սոցիալական ռիսկերի կառավարում, տնտեսության
աճի եւ զարգացման ապահովվման ուղղված բարեփոխումների իրականացում:
Բացի դրանից կշարունակվեն հարկային եւ մաքսային վարչարարության
բարեփոխումները, ինչպես նաեւ նոր հարկային եկամուտների
հայտնաբերումը:
Մ.Թումասյանի խոսքերով, կառավարությունը իրականացնում է նաեւ
ներդրումային ծրագրեր, որոնց շրջանակներում երաշխիքներ,
սուբսիդիաներ է առաջարկում առանձին չափանիշներին բավարարող
ձեռնարկություններին: Ըստ նրա, կարեւոր նշանակություն ունի նաեւ
հակաճգնաժամային միջոցառումների շրջանակում ձեւավորված օպերատիվ
շտաբի գործունեությունը: Մասնավորապես, շտաբի միջոցով շուրջ 300
ծրագրեր են ուսումնասիրվել եւ արդեն 24 նախագծերով տրամադրվել է 17
մլրդ դրամ ընդհանուր գումարի աջակցություն:
Կառավարությունը իրականացնում է նաեւ գործարարության եւ
առանձին ոլորտների աջակցությանն ուղղված ծրագրեր: Ըստ այդմ, Փոքր
եւ միջին ձեռնարկատիրության Զարգացման ազգային կենտրոնն արդեն
իրականացրել է 50 մլն դրամի կապիտալ ներդրում եւ 53 մլն դրամի
վարկավորում: Կառավարությունը նախատեսում է նաեւ սուբսիդիաներ
տրամադրել այն ձեռնարկություններին, որոնք 2009-2011թթ.-ի
ընթացքում կնախաձեռնեն խոշոր ենթակառուցվածքային ծրագրեր:
Մ.Թումասյանի գնահատմամբ, Ճգնաժամային փուլում աճի եւ
զարգացման ապահովությանն ուղղված բարեփոխումները չափազանց կարեւոր
են: Նրա խոսքերով, պետք է այնպիսի քայլեր ձեռնարկել, որպեսզի
որոշակի «օգուտներ ստանանք ճգնաժամից»: «Դրանք պետք է ապահովեն նոր
որակի զարգացում Հայաստանում, որի նպատակը գլոբալ մրցունակությունն
է եւ տնտեսության փոխակերպումը»,- նշեց փոխնախարարը: