Իգնա Սարըասլանն ընտրվել է «ՊԷՆ»-ի Պատվո խորհրդի անդամ
19-06-2009 20:10:00 | Թուրքիա | Մշակույթ
ՍՏԱՄԲՈՒԼ, 19 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Լույս է
տեսել պոլսահայ բանաստեղծուհի Իգնա Սարըասլանի «Թոդորի
մայրամուտին» երկարաշունչ բանաստեղծությունը հայերեն եւ թուրքերեն
լեզուներով:
Բողազիջի համալսարանի հրատարակչության «Միմեսիս»
պարբերաթերթը, որ լույս է տեսնում տարին մեկ անգամ` մոտավորապես
500 էջ ծավալով, իր 15-րդ համարում տպագրել է Սարըասլանի
բանաստեղծության բնագիրն ամբողջությամբ եւ Պերճուհի Բերբերյանի
թուրքերեն թարգմանությունը: Ինչպես գրում է «Մարմարա» օրաթերթը,
հավանաբար առաջին անգամն է, որ թուրքերեն լույս տեսնող
պարբերականում տպագրվում է հայատառ այսքան երկար բանաստեղծություն:
Վկայակոչելով թուրքական մամուլը` «Մարմարա»-ն հայտնում է
նաեւ, որ Իգնա Սարըասլանը ընտրվել է Համաշխարհային գրողների
միության` «ՊԷՆ»-ի տնօրինությանն առընթեր Պատվո խորհրդի անդամ: