«Ոսկե ծիրան» միջազգային 6-րդ կինոփառատոնը կունենա հինգ
մրցութային ժյուրի
19-06-2009 16:38:00 | Հայաստան | Մշակույթ
ԵՐԵՎԱՆ, 19 ՀՈՒՆԻՍԻ, ՆՈՅՅԱՆ ՏԱՊԱՆ: Երեւանում հուլիսի
12-19-ին կայանալիք «Ոսկե ծիրան» միջազգային 6-րդ կինոփառատոնը
կունենա հինգ` միջազգային խաղարկային, միջազգային վավերագարական
ֆիլմերի, «Հայկական համայնապատկեր» ծրագրի, ինչպես նաեւ երկու
միջազգային հասարակական կազմակերպությունների` Էկումենիկ
եկեղեցիների խորհրդի եւ Միջազգային կինոլրագրողների եւ
կինոքննադատների ասոցիացիայի (FIPRESCI) մրցութային ժյուրիներ:
Կինոփառատոնի Մամլո ծառայության տեղեկատվության համաձայն,
խաղարկային ֆիլմերի ժյուրին կղեկավարի Ճապոնացի հանրահայտ ռեժիսոր
եւ սցենարիստ Կոհեյ Օգուրին, վավերագրական ֆիլմերինը` ռուս
կինոպրոդյուսեր եւ ռեժիսոր Ալեքսանդր Ռոդնյանսկին:
«Հայկական համայնապատկեր» կինոմրցույթի ժյուրին կգլխավորի
Նիդեռլանդներից ժամանած Հայկ Բալյանը: Վերջինս որպես կինոարտադրող
1975-1996թթ.-ին մեծ դեր է ունեցել Հոլանդիայի եւ Բելգիայի
առաջատար ընկերություններում, զբաղվել է հեռուստատեսային եւ
կինոարտադրությամբ:
FIPRESCI-ի ժյուրիի կազմում են Ժան-Մաքս Մեժանը (Ֆրանսիա),
Ջովաննի Օտտոնեն (Իտալիա), Արծվի Բախչինյանը (Հայաստան): Իսկ
Էկումենիկի ժյուրիի կազմում ընդգրկված են Գվիդո Կոնվենտսը
(Բելգիա), Դենիս Մյուլլերը (Ֆրանսիա) եւ Հայ առաքելական եկեղեցու
ներկայացուցիչը: