ՀԱԼԵՊ, 22 ՄԱՅԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Հալեպում
ապրիլի 12-ին վախճանվել է տաղանդավոր խմբավար, երգարվեստի անխոնջ
մշակ Պողոս Աբաջյանը:
Հալեպի բեմահարթակներից 1969 թվականին առաջին անգամ հնչել են
«Զվարթնոց» երգչախմբի համերգները` Երեւանի Կոմիտասի անվան
կոնսերվատորիայի շրջանավարտ, երիտասարդ խմբավար Աբաջյանի
ղեկավարությամբ: Այդ օրերից ի վեր հալեպահայությունը
անհամբերությամբ սպասել է Աբաջյանի համերգներին` հայաշունչ երգերով
լիցքավովելու համար,- գրում է «Մարմարան»` վկայակոչելով
«Ասպարեզ»-ը:
«Զվարթնոց» երգչախմբի կատարմամբ հնչել են հայ երգարվեստի
գոհարները, դասական երաժշտության բարձրարժեք հատվածներ, արաբերեն
երգերի բազմաձայն կատարումներ` դաշնամուրի նվագակցությամբ, որ
արժանացել են երաժշտագետների բարձր գնահատականին:
Աբաջյանը դասավանդել է Կարեն Էպպե ճեմարանում ու Պետական
կոնսերվատորիայում: Այնուհետեւ հիմնել է իր «Նարեկացի»
երգչախումբը, համերգներով նպաստել է հայ երգչախմբային արվեստի
տարածմանը ոչ միայն Հալեպում, այլեւ Դամասկոսում, Բեյրութում,
Լաթաքիայում, Քեսաբում եւ Քամիշլիում:
Հատկանշական էր նրա խմբավարությամբ «Լուսավորիչ» եգչախմբի
ելույթը` Հայաստանում Քրիստոնեության ընդունման 1700-ամյակի առթիվ
եւ Դեր Զորում քառաձայն պատարագը` Հայոց երկու Վեհափառներ Գարեգին
Բ-ի եւ Արամ Ա-ի վսեմաշուք ներկայությամբ: