ԱՄՀ-ը հնարավորինս կօժանդակի Հայաստանի առջեւ ծառացած
խնդիրների հաղթահարմանը
13-04-2009 20:12:00 | Հայաստան | Տնտեսություն
ԵՐԵՎԱՆ, 13 ԱՊՐԻԼԻ, ՆՈՅՅԱՆ ՏԱՊԱՆ: Ընդունելով ապրիլի 11-ին
Արժույթի միջազգային հիմնադրամի (ԱՄՀ) Միջին Արեւելքի եւ
Կենտրոնական Ասիայի նորանշանակ տարածաշրջանային տնօրեն Մասուդ
Ահմեդին, Հայաստանի նախագահ Սերժ Սարգսյանը գոհունակություն է
հայտնել ԱՄՀ-ի հետ համագործակցության եւ Հայաստանին ցուցաբերվող
ֆինանսական ու խորհրդատվական աջակցության համար:
Ըստ ՀՀ նախագահի Մամլո գրասենյակից «ՆՈՅՅԱՆ ՏԱՊԱՆ»-ին
տրամադրած հաղորդագրության, հանդիպման ընթացքում զրուցակիցները
քննարկել են համաշխարհային ֆինանսատնտեսական ճգնաժամի հետեւանքները
մեղմելուն վերաբերող հարցեր:
Ս.Սարգսյանն ընդգծել է, որ առկա կարողություններն ու
ֆինանսական հնարավորություններն արդյունավետորեն օգտագործելով
Հայաստանի իշխանություններն անելու են հնարավորը տնտեսության
առավել տուժած ոլորտներին եւ հասարակության կարիքավոր խմբերին
հասցեական աջակցություն ցուցաբերելու համար:
Մ.Ահմեդը տեղեկացրել է Լոնդոնում վերջերս տեղի ունեցած «Մեծ
քսանյակի» գագաթաժողովի ընթացքում քննարկված հարցերի ու ձեռքբերված
պայմանավորվածությունների մասին: Նա հավաստել է, որ ԱՄՀ-ը, հաշվի
առնելով իրական կարիքները, այսօր ջանում է ավելի ճկուն
քաղաքականություն վարել պետություններին ֆինանսական օժանդակություն
տրամադրելու հարցում: Ընդգծելով Հայաստանի հետ համագործակցության
կարեւորությունը, Մ.Ահմեդը պատրաստակամություն է հայտնել
ստեղծված դժվարին պայմաններում հնարավորինս օժանդակել Հայաստանի
առջեւ ծառացած խնդիրների հաղթահարմանը: