Ըստ ԱՄՀ-ի պաշտոնյայի, 2010թ.-ի սկզբից կսկսվի համաշխարհային
տնտեսության կայունացումը
10-04-2009 21:00:00 | Հայաստան | Տնտեսություն
ԵՐԵՎԱՆ, 10 ԱՊՐԻԼԻ, ՆՈՅՅԱՆ ՏԱՊԱՆ: 2009թ.-ը մռայլ տարի է
լինելու աշխարհի համար, սակայն 2010թ.-ի սկզբից կսկսվի
համաշխարհային տնտեսության կայունացումը: Այս մասին ապրիլի 10-ին
Երեւանում կազմակերպված «Գլոբալ տնտեսական եւ ֆինանսական ճգնաժամի
ազդեցությունը Հայաստանի տնտեսության վրա» թեմայով քննարկմանը
հայտարարեց Արժույթի միջազգային հիմնադրամի (ԱՄՀ) Միջին Արեւելքի
եւ Կենտրոնական Ասիայի նորանշանակ տարածաշրջանային տնօրեն Մասուդ
Ահմեդը: «Կայունացումը կախված է այն քաղաքականությունից, որն
առաջիկա ամիսներին կիրականացնեն տարբեր երկրները: Այդ
քաղաքականությունը ներառում է լիկվիդայնության ապահովում, բանկային
համակարգերի մաքրում, հովանավորչության քաղաքականության
բացառում»,- նշեց նա:
Ըստ Մ.Ահմեդի, ներկայիս ֆինանսատնտեսական ճգնաժամն առավել
ծանրն է մեծ դեպրեսիայից եւ Երկրորդ աշխարհամարտից հետո, ինչն
արտացոլվում է ԱՄՀ-ի կանխատեսումներում. հիմնադրման ժամանակներից
նման վատ կանխատեսումներ ԱՄՀ-ն չի արել: Մասնավորապես, ԱՄՀ-ի
կանխատեսումներով, համաշխարհային տնտեսությունը 2009թ.-ին կկրճատվի
0,5-1%-ով, իսկ անկումը զարգացած երկրներում կկազմի 3-3,5%:
2010թ.-ին կարձանագրվի աննշան աճ 1,5-2,5%ով, զարգացած երկրներում`
0-0,5%, իսկ զարգացող երկրներում` 3,5-4,5%:
ԱՄՀ-ի պաշտոնյան հայտարարեց, որ Հարավկովկասյան տարածաշրջանի
բոլոր երկրներում կտրուկ նվազել են արտահանման աճի տեմպը եւ
օտարերկրյա ուղղակի ներդրումները: Ըստ Մ.Ահմեդի, ի տարբերություն
տարածաշրջանի մյուս երկրների, Հայաստանի տնտեսությունը գտնվում է
համեմատաբար բարվոք վիճակում: Մասնավորապես, Հայաստանի
առավելություններից մեկն այն է, որ երկրի բանկային համակարգում
արտարժութային վարկերի առումով նույն ռիսկերը չկան, ինչ այլ
պետություններում: Նշվեց նաեւ, որ գնաճի մակարդակը Հայաստանում այլ
պետությունների համեմատ բավական մեղմ է, ինչը ավելի լավ ելակետային
վիճակ է ստեղծում մարտահրավերներին դիմակայելու առումով: