Շվեդիան պատրաստակամ է աջակցելու Հայաստանի կառավարության
հավակնոտ ծրագրերի ու նախաձեռնությունների իրականացման գործում
02-04-2009 21:00:00 | Հայաստան | Տնտեսություն
ԵՐԵՎԱՆ, 2 ԱՊՐԻԼԻ, ՆՈՅՅԱՆ ՏԱՊԱՆ: Հայաստանը պատրաստ է
Շվեդիայի հետ փոխգործակցությունը զարգացնել ինչպես երկկողմ, այնպես
էլ Եվրոմիության հետ համագործակցության շրջանակներում: Շվեդիայի
Թագավորության առեւտրի հարցերով պետական քարտուղար Գուննար
Ուիսլանդերի հետ ապրիլի 2-ի հանդիպման ժամանակ այս մասին նշել է ՀՀ
վարչապետ Տիգրան Սարգսյանը: Ողջունելով վերջին շրջանում
հայ-շվեդական շփումներում նկատվող ակտիվացման միտումները,
վարչապետը հույս է հայտնել, որ պետքարտուղարի գլխավորած
պատվիրակության այս այցը եւս կնպաստի երկու երկրների միջեւ
քաղաքական եւ տնտեսական հարաբերությունների առաջընթացին:
Ներկայացնելով արդի փոփոխվող աշխարհում Հայաստանի զարգացման
հնարավորություններն ու ծրագրերը, Տ.Սարգսյանը համոզմունք է
հայտնել, որ Եվրոմիության եւ գործընկեր այլ երկրների ու միջազգային
կառույցների օժանդակությամբ Հայաստանին կհաջողվի հաղթահարել ինչպես
համաշխարհային ֆինանսատնտեսական ճգնաժամով պայմանավորված
ժամանակավոր, այնպես էլ ավելի երկարաժամկետ զարգացման ընթացքում
հնարավոր դժվարությունները: Վարչապետը Եվրոմիության հետ
համագործակցության վերջին հաջողություններից է համարել հունվարի
1-ից GSP+ համակարգում Հայաստանի ներգրավումը:
Ըստ ՀՀ կառավարության Տեղեկատվության եւ հասարակայնության հետ
կապերի վարչության հաղորդագրության, անդրադառնալով երկկողմ
տնտեսական կապերին, Տ.Սարգսյանն ընդգծել է OMX ֆոնդային բորսայի
հետ համագործակցությունը, որը, ըստ նրա, կարեւոր փուլ է Հայաստանի`
որպես տարածաշրջանային ֆինանսական կենտրոնի, հավակնությունների
իրականացման գործում: Այդ համատեքստում 2008թ.-ին հունվարին
Հայաստանի ֆոնդային բորսայի եւ Կենտրոնական դեպոզիտարիայի
կառավարումը հանձնվել է այդ ընկերությանը: Վարչապետը նաեւ հույս է
հայտնել, որ OMX-ի հետ փոխշահավետ համագործակցությունը օրինակ
կհանդիսանա նաեւ շվեդական այլ ընկերություններին` Հայաստանում
ներդրումներ կատարելու համար:
Իր հերթին Գ.Ուիսլանդերը նշել է, որ թեեւ Հայաստանի եւ
Շվեդիայի միջեւ ինչպես երկկողմ, այնպես էլ ԵՄ-ի Հարեւանության
քաղաքականության շրջանակներում համագործակցությունը բավական լավ է
ընթանում, այդուհանդերձ հնարավորություններն ավելին են: Ողջունելով
Հայաստանի հետագա զարգացմանն ուղղված ՀՀ կառավարության հավակնոտ
ծրագրերն ու նախաձեռնությունները, նա հավաստիացրել է, որ իր երկիրը
պատրաստակամ է այդ ամենի իրականացման գործում հնարավորինս
աջակցելու եւ օժանդակելու Հայաստանին: