Ապրիլի 1-ից Կապանի լեռնահարստացման կոմբինատը կվերսկսի
աշխատանքը
31-03-2009 19:14:00 | Հայաստան | Տնտեսություն
ԿԱՊԱՆ, 31 ՄԱՐՏԻ, ՆՈՅՅԱՆ ՏԱՊԱՆ: Կապանի նախկին
լեռնահարստացման կոմբինատի` «Դինո Գոլդ Մայնինգ Քամփնի» ՓԲԸ-ի,
գլխավոր տնօրեն Ռոբերտ Ֆալլետան մարտի 30-ի ասուլիսում հայտարարել
է, որ ապրիլի 1-ից ձեռնարկությունը կսկսի աշխատել:
Ձեռնարկությունում կաշխատեն 950-1000 մարդ` նախկին 1200-ի փոխարեն:
Կոմբինատը կարտադրի պղնձի ու ցինկի խտանյութ, ընդ որում ցինկինը
առայժմ կպահեստավորվի, իսկ պղնձինը կվաճառվի:
«Մասսայական կրճատումներ չեն սպասվում, աշխատավարձի
տարբերություն նախկինի համեմատ չի լինի, իսկ աշխատակիցների հետ
կկնքվեն նոր աշխատանքային պայմանագրեր»,- ասել է Ռ.Ֆալետան:
Հարկադիր պարապուրդի ժամանակահատվածում ձեռնարկությունում
զգալի աշխատանքներ են կատարվել: Հանքում ու ֆաբրիկայում նորացվել
են օդափոխիչ համակարգերը, տեղադրվել են լուսավորության սարքեր,
մշակվել են նոր տեխնոլոգիաներ, որոնք կկիրառվեն հետագայում:
Ռ.Ֆալլետայի խոսքով, կշարունակվի նաեւ Կապանի տարածաշրջանում
սոցիալական ուղղվածությամբ ծրագրերի իրականացումը: