ԵՐԵՎԱՆ, 19 ՄԱՐՏԻ, ՆՈՅՅԱՆ ՏԱՊԱՆ: «Յունիբանկ»-ը շարունակում է
աճի ընթացքը` 7 տարվա հաջող գործունեությունից հետո: 2008թ.-ին
բանկին հաջողվել է ամրապնդել դիրքերը Հայաստանի դեպոզիտային եւ
վարկավորման շուկաներում. հիփոթեքային վարկավորման ոլորտում
«Յունիբանկ»-ը դուրս է եկել 2-րդ տեղ, ֆիզիկական անձանցից
ավանդների ներգրավման գծով` 1-ին տեղ, իսկ Հայաստան փոխանցումների
ծավալի ավելի քան 50%-ն իրականացվում է «Յունիբանկ»-ի միջոցով: Այս
մասին մարտի 19-ի ասուլիոսում հայտնեց «Յունիբանկ»-ի խորհրդի
նախագահ եւ բանկի հիմնադիր ռուսաստանյան «Յունիաստրում Բանկ»-ի
նախագահ Գագիկ Զաքարյանը:
Նա նաեւ նշեց, որ 2009թ.-ի փետրվարին «Յունիբանկ»-ի կապիտալը
համալրվել է մոտ 10 մլն ԱՄՆ դոլարով (3 մլրդ դրամով), ինչը
պայմանավորված է այն հանգամանքով, որ բանկում զգում են
վարկավորման, մասնավորապես, փոքր եւ միջին ձեռնարկատիրության
վարկավորման պահանջարկը, եւ այդ ուղղությամբ ծրագրերի ծավալներն
աճելու են: Գ.Զաքարյանի գնահատմամբ, աճելու են նաեւ սննդամթերքի
արտադրության, ներմուծումը փոխարինելու ներուժ ունեցող ոլորտների
ձեռնարկությունների վարկավորման ծավալները:
Բանկի կապիտալի համալրման գործընթացի ավարտից հետո
«Յունիբանկ»-ի կանոնադրական կապիտալը կազմել է 8 մլրդ 599,7 մլն
դրամ, իսկ ընդհանուր կապիտալը` մոտ 11,5 մլրդ դրամ:
Բանկիրի տվյալներով, ներկայումս «Յունիբանկ»-ի կապիտալի
համարժեքության մակարդակը 20% է, ինչը բարձր ցուցանիշ է, եւ եթե
հետագայում բանկի ակտիվներն աճեն այնքան արագ, որ կապիտալի
համարժեքության ցուցանիշը բավարար չլինի, ապա կապիտալի ծավալը
կմեծացվի: Բանկի վարչության նախագահ (գործադիր տնօրեն) Վարդան
Աթայանը հայտնեց, որ վերջրերս «Յունիաստրում Բանկ»-ի հետ կնքված
պայմանագրի շրջանակներում ն «Յունիբանկ»-ը ներգրավել է 50 մլն ԱՄՆ
դոլարի վարկային միջոցներ: Ստացված ֆինանսական միջոցները բանկը
ուղղել է վարկավորման ծրագրերի իրականացմանը:
Նշենք նաեւ, որ ընդհանուր պարտավորությունների մեջ ֆիզիկական
անձանց ավանդների բաժինը 2008թ.-ի դեկտեմբերի վերջին
«Յունիբանկ»-ում կազմել է 62%, եւ այդ ցուցանիշով բանկը ՀՀ
բանկային համակարգում զբաղեցրել է առաջին դիրքը: Բանկի ֆիզիկական
անձանց ավանդների (ցպահանջ պարտավորությունների եւ ժամկետային
ավանդների) ծավալը կազմել է 36,6 մլրդ դրամ. այդ ցուցանիշով
«Յունիբանկ»-ն զբաղեցրել է երկրորդ տեղը:
2008թ.-ին «Յունիբանկ»-ն սպասարկել է ավելի քան 1,4 մլն
հաճախորդի: «Յունիստրիմ» դրամական փոխանցումների համակարգին բաժին
է ընկել Հայաստանի դրամական փոխանցումների շուկայի 50%-ից ավելին:
2008թ.-ի արդյունքներով, համակարգի շրջանառությունը կազմել է ավելի
քան 801 մլն ԱՄՆ դոլար:
2008թ.-ի դեկտեմբերի 30-ի դրությամբ «Յունիբանկ»-ում
ֆիզիկական անձանց ժամկետային ավանդների ծավալը հասել է 32 մլրդ 541
մլն դրամի. աճը տարվա ընթացքում կազմել է 27%: Բանկի ակտիվները
կազմել են ավելի քան 68 մլրդ 141 մլն դրամ եւ տարվա ընթացքում աճել
ավելի քան 49,4%-ով: Ընդհանուր կապիտալն աճել է 25,8%-ով եւ
գերազանցել 8 մլրդ 822 մլն դրամը: Բանկի զուտ շահույթը կազմել է 1
մլրդ 729 մլն դրամ` հինգ անգամ գերազանցելով նախորդ տարվա
համապատասխան ցուցանիշը: «Յունիբանկ»-ի պարտավորությունները
2008թ.-ին աճել են 53,7%-ով եւ կազմել 59 մլրդ 319 մլն դրամ:
Վարկային պորտֆելի աճն այդ տարի կազմել է 17 մլրդ դրամ, ծավալը
2008թ.-ի դեկտեմբերի 30-ի դրությամբ` 46 մլրդ 691 մլն դրամ: