Ռեցեսիան ԱՄՆ-ում կարող է ավարտվել արդեն 2009 թվականի վերջին
17-03-2009 13:31:00 | ԱՄՆ | Միջազգային
ՎԱՇԻՆԳՏՈՆ, 17 ՄԱՐՏԻ, ՆՈՅՅԱՆ ՏԱՊԱՆ: ԱՄՆ-ի դաշնապետական
ռեզերվային համակարգի (ԴՌՀ) ղեկավար Բեն Բեռնանկեն կարծիք է
հայտնել, որ Միացյալ Նահանգներում ռեցեսիան կարող է ավարտվել արդեն
2009 թվականին, եթե կառավարությունը հաջողությամբ սատարի բանկային
համակարգին:
«Մենք ունենք ծրագիր: Աշխատում ենք դրա վրա, եւ կարծում եմ,
որ իրավիճակը կկայունանա, եւ ռեցեսիան, հնարավոր է, ավարտվի տարվա
վերջին»,- ասել է Բեռնանկեն CBS հեռուստաալիքին տված
հարցազրույցում:
Սակայն, ԴՌՀ-ի ղեկավարի կարծիքով, ռեցեսիայի ավարտը ընթացիկ
տարում եւ տնտեսական վերելքի սկիզբը հաջորդ տարի հնարավոր է մի
շարք պայմանների կատարման դեպքում` բանկերին նորից հնարավորություն
տալ ավելի ազատորեն վարկեր եւ փոխառություններ տրամադրել եւ
ապահովել ֆինանսական շուկաների կայունությունը: