ԱՄՀ-ի կանխատեսումներով այս տարի Հայաստանում կգրանցվի
տնտեսության 1,5% անկում
03-03-2009 17:00:00 | Հայաստան | Տնտեսություն
ԵՐԵՎԱՆ, 3 ՄԱՐՏԻ, ՆՈՅՅԱՆ ՏԱՊԱՆ: Արժույթի միջազգային
հիմնադրամի մասնագետները Հայաստանում իրականացրած դիտարկումների
արդյունքում արձանագրել են, որ համաշխարհային ֆինանսա-տնտեսական
ճգնաժամն, այնուամենայնիվ, իր բացասական ազդեցությունն ունենում է
Հայաստանի տնտեսության վրա: Այս մասին մարտի 3-ի ասուլիսում
հայտնեց Հայաստանում ԱՄՀ-ի մշտական ներկայացուցիչ Նինկե Օմեսը:
Նրա խոսքերով, ԱՄՀ-ի կանխատեսումներով այս տարի Հայաստանում
կգրանցվի տնտեսության 1,5% անկում: Ըստ Ն.Օմեսի, նախորդ տարի
2007թ.-ի համեմատ 44%-ով նվազել են Հայաստանից արտահանման
ծավալները: Եթե նախկինում մասնավոր տրանսֆերտների ծավալը տարեկան
35%-ով աճում էր, ապա այս տարվա հունվարին նախորդ տարվա նույն
ժամանակահատվածի համեմատ դրանք 25%-ով նվազել են: Դա, Ն.Օմեսի
խոսքերով, հիմնականում պայմանավորված է Ռուսաստանում առկա լուրջ
տնտեսական խնդիրներով, իսկ Հայաստան եկող տրանսֆերտների հիմնական
մասը հենց այդ երկրից է:
Ըստ ԱՄՀ-ի ներկայացուցչի, Հայաստանի վրա բացասաբար է
անդրադառնում նաեւ համաշխարհային շուկայում պղնձի եւ մոլիբդենի
գների կտրուկ անկումը: «Հայաստանում ՀՆԱ-ի աճը զգալիորեն դանդաղել
է. 2007թ.-ի 14%-ի դիմաց 2008թ.-ին այն կազմել է 7%: Մինչեւ
տարեվերջ կանխատեսում ենք 8% սղաճ, ինչն այնքան էլ վատ ցուցանիշ
չէ»,- ասաց Ն.Օմեսը: Նա ընդգծեց, որ այս պայմաններում շատ կարեւոր
է միջազգային կառույցների օժանդակությունը:
Նշենք, որ ԱՄՀ-ի կառավարիչ-տնօրեն Դոմինիկ Ստրաուս-Քանը ԱՄՀ-ի
Գործադիր խորհրդին առաջարկելու է հաստատել Հայաստանին 540 մլն
դոլար վարկ տրամադրելու ծրագիրը: Ն.Օմեսի խոսքերով, եթե խորհուրդը
մարտի 6-ին այդ առաջարկն ընդունի, ապա Հայաստանին արդեն հաջորդ
շաբաթ շուրջ 239 մլն դոլար վարկ կտրամադրվի: Այն կհատկացվի 3 տարի
արտոնյալ, առավելագույնը 5 տարի մարման ժամկետով: Կկիրառվի հատուկ
փոխառության իրավունքի տոկոսադրույքը` 1,54%: Վարկը հատկացվելու է
ՀՀ Կենտրոնական բանկին` արտարժութային պահուստները համալրելու
նպատակով: