ՀՀ ԿԲ-ի եւ Վերակառուցման եւ զարգացման միջազգային բանկի
միջեւ կնքվել է Հայաստանի ՓՄՁ-ների խրախուսման 50 մլն դոլարի
վարկային պայմանագիր
27-02-2009 23:55:00 | Հայաստան | Տնտեսություն
ԵՐԵՎԱՆ, 27 ՓԵՏՐՎԱՐԻ, ՆՈՅՅԱՆ ՏԱՊԱՆ: ՀՀ Կենտրոնական բանկի եւ
Համաշխարհային բանկի խմբի անդամ հանդիսացող Վերակառուցման եւ
զարգացման միջազգային բանկի (ՎԶՄԲ) միջեւ կնքվել է պայմանագիր 50
մլն ԱՄՆ դոլար գումարի վարկային ռեսուրսների ներգրավման
վերաբերյալ: Պայմանագիրը ստորագրել են ՀՀ ԿԲ նախագահ Արթուր
Ջավադյանը եւ Համաշխարհային բանկի երեւանյան գրասենյակի տնօրեն
Արիստոմենե Վարուդակիսը:
Ըստ ՀՀ ԿԲ Հասարակայնության հետ կապերի ծառայության,
վարկավորվող ծրագրի նպատակն է Հայաստանում մասնավոր փոքր ու միջին
ձեռներեցության խրախուսումը եւ զարգացումը` միջին ժամկետայնության
վարկային միջոցների հասանելիության մակարդակը բարձրացնելու
միջոցով: Ծրագրի իրականացումը նպաստավոր պայմաններ է ստեղծելու
նաեւ ծրագրում ներգրավված հայկական բանկերի համար: Վարկային
միջոցները ՎԶՄԲ-ից ՀՀ ԿԲ-ին են տրամադրվում 26,5 տարի մարման եւ 5
տարի արտոնյալ ժամկետով` ՀՀ Ֆինանսների նախարարության
երաշխավորությամբ:
Վարկային միջոցները տեղաբաշխվելու են ծրագրի գործընկեր
ֆինանսական կազմակերպությունների միջոցով, որոնց հետ ՀՀ ԿԲ-ն
կնքելու է վարկային պայմանագրեր: Գործընկեր ֆինանսական
կազմակերպությունների ընտրությունը իրականացվելու է մրցութային
կարգով` Համաշխարհային բանկի կողմից սահմանված չափանիշների հիման
վրա:
Հաշվի առնելով, որ ՀՀ տարածքում գործող ՓՄՁ-ների գերակշիռ
մասի եկամուտներն ու ծախսերն արտահայտվում են ՀՀ դրամով, սպասվում
է, որ վարկերի մեծ մասը կտրամադրվի ազգային արժույթով, սակայն
ծրագիրը հնարավորություն է ընձեռում վարկավորումն իրականացնել նաեւ
ԱՄՆ դոլարով, եթե վարկառուները կներկայացնեն այդպիսի պահանջ եւ
կհիմնավորեն իրենց արտարժութային եկամուտների աղբյուրները:
Ծրագրի շրջանակներում վարկային միջոցների կարող են հավակնել
ՀՀ տարածքում գրանցված մասնավոր ձեռնարկությունները, որոնց տարեկան
շրջանառությունը չի գերազանցում 500 միլիոն դրամը (մոտ 1 մլն 635
հազար ԱՄՆ դոլար ):
Ծրագիրն իրականացվելու է ՀՀ ԿԲ կողմից 2001թ.-ին հիմնադրված
«Գերմանահայկական հիմնադրամ» ծրագրերի կառավարման գրասենյակ»
հիմնարկի միջոցով: