Հայաստանի կառավարությունը կարող է հրաժարվել ռիսկայնության
բարձր մակարդակի ծախսերից
26-02-2009 14:12:00 | Հայաստան | Տնտեսություն
ԵՐԵՎԱՆ, 26 ՓԵՏՐՎԱՐԻ, ՆՈՅՅԱՆ ՏԱՊԱՆ: ՀՀ գերատեսչություններից
եւ համայնքներից շատերը դեռեւս չեն կատարել օրենքով սահմանված այն
պահանջը, որը վերաբերում է ՀՀ Վերահսկիչ պալատի
ուսումնասիրություների եզրակացություններին համայնքների եւ
գերատեսչությունների կողմից պատասխանների ներկայացմանը: ՀՀ
կառավարության փետրվարի 26-ի նիստում վարչապետ Տիգրան Սարգսյանը
նշեց, որ իր կողմից այսօր տրվելիք հանձնարարկանի համաձայն, օրենքի
նշված պահանջը պետք է կատարվի առաջիկա մեկ շաբաթվա ընթացքում,
հակառակ դեպքում` «ստիպված կլինենք այլ միջոցների դիմել»:
Բացի այդ, ՀՀ վարչապետի խոսքերով, 2008թ.-ին Վերահսկիչ պալատի
իրականացրած աշխատանքները ցույց են տվել, որ կան բյուջեի ծախսերի
արդյունավետության ապահովման լուրջ խնդիրներ: Նշվեց, որ Վերահսկիչ
պալատի նախագահին առաջարկվել է իրականացնել բյուջետային ծախսերի
արդյունավետության ռիսկերի վերլուծության վրա հիմնված
վերահսկողություն: Ըստ Տ.Սարգսյանի, Վերահսկիչ պալատի նախագահը
պետք է կառավարությանը ներկայացնի այն ոլորտների ցանկը, որտեղ
ստուգումների արդյունքներով արձանագրվել է ծախսերի ռիսկայնության
չափազանց բարձր մակարդակ: Նա հավելեց, որ այդ ռիսկայնության
մակարդակի անփոփոխ մնալու դեպքում կառավարությունը կհրաժարվի նշված
ծախսերից, «մանավանդ, եթե գերատեսչությունները Վերահսկիչ պալատի
ուսումնասիրությունների արդյունքների հիման վրա դասեր չեն քաղել»:
Վարչապետն ընդգծեց, որ այդ ծախսերից հրաժարվելը, հնարավոր է,
հանգեցնի ՀՀ 2009թ.-ի պետբյուջեի լուրջ խնայողությունների: