ԱՄՆ-Ի ԶԻՆՎՈՐՆԵՐԻՆ ԹՈՒՅԼԱՏՐՎԵԼ Է ԻՐԱՔՈՒՄ ՈՉՆՉԱՑՆԵԼ ԻՐԱՆԻ
ՀԱՏՈՒԿ ԾԱՌԱՅՈՒԹՅՈՒՆՆԵՐԻ ԳՈՐԾԱԿԱԼՆԵՐԻՆ
26-01-2007 20:45:00 | ԱՄՆ | Միջազգային
ՎԱՇԻՆԳՏՈՆ, 26 ՀՈՒՆՎԱՐԻ, ՆՈՅՅԱՆ ՏԱՊԱՆ: ԱՄՆ-ի նախագահի
վարչակազմը ամերիկյան զինվորներին թույլատրել է Իրաքում ոչնչացնել
եւ գերի վերցնել Իրանի հատուկ ծառայությունների գործակալներին,
ուրբաթ գրում է «Վաշինգտոն պոստ» թերթը:
Այդ միջոցառումը վերաբերում է Իրաքում իրանական
հետախուզության գործակալներին եւ «Իսլամական հեղափոխության
պահապանների կորպուսի» աշխատակիցներին եւ չի վերաբերում իրանցի
դիվանագետներին եւ խաղաղ բնակիչներին:
Ինչպես հաղորդում է թերթը` վկայակոչելով ԱՄՆ-ի կառավարությանը
եւ ահաբեկության դեմ պայքարի ծառայությանը, Բուշի վարչակազմի
որոշումը «նոր ռազմավարության մի մասն է, որի նպատակն է թուլացնել
Իրանի ազդեցությունը տարածաշրջանում եւ ստիպել Թեհրանին
հրաժարվելու միջուկային ծրագրից»:
Ինչպես հաղորդում է թերթը, վերջին ժամանակներս ամերիկյան
հրամանատարությունը Իրաքում վարում է «ձերբակալության եւ հետագա
ազատ արձակման» քաղաքականություն իրանցի գործակալների նկատմամբ:
Այդ քաղաքականության նպատակն է, մի կողմից, ահաբեկել իրանական
կողմին, իսկ մյուս կողմից` կանխարգելել բռնության ծավալումը
երկրում:
Ավելի վաղ այս ամսին ամերիկացի զինծառայողները ներխուժել են
Էրբիլում գտնվող (Քուրդիստան) Իրանի ներկայացուցչություն եւ
ձերբակալել նրա վեց աշխատակիցներին: Ամերիկացիները, զինաթափելով
պահակներին, առգրավել են կոմպյուտերները եւ փաստաթղթերը, ընդ որում
որեւէ բացատրություն չներկայացնելով: