2007 Թ.-ԻՆ ՀԱՅԱՍՏԱՆՈՒՄ ԿԳՈՐԾԵՆ ՆԵՐԱՌԱԿԱՆ ԿՐԹՈՒԹՅԱՆ ԵՎՍ 8
ԴՊՐՈՑՆԵՐ
18-01-2007 16:45:00 | Հայաստան | Հասարակություն
ԵՐԵՎԱՆ, 18 ՀՈՒՆՎԱՐԻ, ՆՈՅՅԱՆ ՏԱՊԱՆ: 2007թ.-ին նախատեսվում է
Հայաստանի եւս ութ` 4-ական` Երեւանում եւ Տավուշի մարզում,
դպրոցներում ներդնել ներառական կրթության համակարգը: Նշենք, որ
վերջինիս միջոցով ապահովվում են առանձնահատուկ պայմաններ կրթության
կարիք ունեցող երեխաների ուսումը հանրակրթական դպրոցներում
կազմակեպելու համար: Ներկայումս գործում են ներառական կրթության 6
դպրոցներ` Երեւանում:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեց հաշմանդամ
երեխաների հիմնահարցերով զբաղվող «Հույսի կամուրջ» հասարակական
կազմակերպության Կրթական ծրագրերի պատասխանատու Շուշան
Մաթեւոսյանը, այդ 8 դպրոցներում, որոնցում ներկայումս սովորում են
կրթության առանձնահատուկ պայմանների կարիք ունեցող 85 աշակերտներ,
իրականացվում են համակարգի ներդրմանն ուղղված նախապատրաստական
աշխատանքներ, արդեն վերապատրաստում են անցել 32 ուսուցիչներ:
Ի դեպ, ըստ ՀՀ Աշխատանքի եւ սոցիալական հարցերի նախարարության
տվյալների, հաշմանդամների տվյալների բանկում հաշվառված են մինչեւ
18 տարեկան 8300 երեխաներ, որոնց 11,5%-ը մինչեւ ութ տարեկան են: