ԵՐԵՎԱՆ, 12 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի եւ Վրաստանի
գրողների միությունների միջեւ մոտ օրերս կստորագրվի առաջիկա մի
քանի տարիների համագործակցության նոր ծրագիր: Այս մասին հունվարի
12-ին «Ուրբաթ» ակումբում Վրաստանի Գրողների միության նախագահ
Մաղվալա Գոնաշվիլու հետ համատեղ ասուլիսում հայտնեց Հայաստանի
գրողների միության (ՀԳՄ) նախագահ Լեւոն Անանյանը: Ըստ նրա, վերջին
տարիներին արդեն քայլեր են ձեռնարկվել հայ-վրացական գրական կապերը
վերականգնելու ուղղությամբ: Մասնավորապես, Հայաստանում եւ
Վրաստանում 2006թ.-ին անցկացվել են հայ եւ վրացական պոեզիայի օրեր:
Նշվեց, որ այս տարի վրացերենով կհրատարակվի «Հայ պոեզիայի
անթոլոգիան», իսկ հայերենով` «Վրաց պոեզիայի անթոլոգիան»: ՀԳՄ-ի
նախագահը հայտնեց, որ ոչ միայն վերականգնվել են վրաց, այլեւ ռուս
եւ պարսիկ գրողների հետ գրական կապերը: Ըստ նրա, այս տարի
կկազմակերպվեն հայ գրողների հանդիպումներ ուկրաինացի, ռումինացի եւ
լիբանանցի գործընկերների հետ:
Երկու երկրների գրողների միություննների նախագահներն
անդրադարձան նաեւ հանրակրթական դպրոցներում գրականության
դասավանդման հարցին: Լ.Անանյանի խոսքերով, հայկական դասագրքերում
ժամանակակից գրականությունը անտեսված է, եւ այդ պատճառով աճող
սերունդը ծանոթ չէ հայ ժամանակակից գրողներին: Լ.Անանյանի
կարծիքով, եթե այդպես շարունակվի, ապա «բարեփոխումների
եվրոպականացմանը տրվելով կկորցնենք մեր ազգային դպրոցի
ավանդույթները»:
Ըստ Մ.Գոնաշվիլու, ի տարբերություն Հայաստանի, Վրաստանի
դպրոցական դասագրքերում ընդգրկված են վրաց ժամանակակից գրողների
գործերը: