ՀՈՒՆՎԱՐ-ՀՈԿՏԵՄԲԵՐԻՆ ՀԱՅԱՍՏԱՆՈՒՄ ԳՈՐԾԱԶՈՒՐԿԻ ԿԱՐԳԱՎԻՃԱԿ ԵՆ
ՈՒՆԵՑԵԼ 89,6 ՀԱԶԱՐ ՄԱՐԴ
21-12-2006 15:15:00 | Հայաստան | Հասարակություն
ԵՐԵՎԱՆ, 21 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում տնտեսապես
ակտիվ բնակչության միջին թվաքանակը այս տարվա հունվար-հոկտեմբերին
կազմել է 1206,4 հազար մարդ, որոնցից 92,6%-ը կամ 1116,8 հազարն է
զբաղված եղել տնտեսության մեջ, իսկ 7,4%-ը կամ 89,6 հազարը
աշխատանք չեն ունեցել: Վերջիններս հաշվառվել են ՀՀ Աշխատանքի եւ
սոցիալական հարցերի նախարարության «ՀՀ Զբաղվածության ծառայություն»
գործակալությունում եւ ստացել գործազուրկի կարգավիճակ:
Հոկտեմբերի վերջի դրությամբ գործազուրկների թիվը կազմել է
87,7 հազար մարդ, որոնցից 62,8 հազարը (71,6%-ը)` կանայք են: Այս
ցուցանիշը նախորդ ամսվա համեմատ նվազել է 0,3%-ով, իսկ 2005թ.-ի
նույն ամսվա համեմատ` 0,9%-ով աճել:
ՀՀ Ազգային վիճակագրական ծառայության տվյալներով, տարեսկզբից
աշխատանքի են տեղավորվել 7 հազար մարդ, այդ թվում 4,2 հազարը
(60%-ը)` կանայք: